Qazaqstan Respýblikasynyń Prezidenti Qasym-Jomart Toqaevtyń Aqtóbe qalasynda Tahaýi Ahtanov atyndaǵy drama teatry úshin jańa ǵimarat salý jónindegi tapsyrmasyn júzege asyrý aiasynda Úkimet rezervten 8 mlrd teńge bóldi, dep habarlaidy ult.kz.
Tiisti qaýlyǵa Premer-ministr Oljas Bektenov qol qoidy.
Úkimet bólgen qarjy teatr qurylysyn osy jyldyń sońyna deiin aiaqtaýǵa múmkindik beredi.
Teatr qala men aimaqtyń mádeni ómiri úshin óte mańyzdy, onyń tarihy 80 jyldan asady.
Teatrdyń jańa ǵimaraty Altyn orda shaǵyn aýdanynda salynyp jatyr, 700 orynǵa eseptelgen teatr ónerdiń zamanaýi talaptaryna sai úlken jáne kishi zaldardan, zamanaýi repetitsiialyq úi-jailar men sahnalyq keńistikterden turady. Teatrdyń ainalasynda demalys ortalyqtary, saiabaq pen qala turǵyndarynyń demalýyna arnalǵan stadion salý kózdelgen.
Jańa mádeni nysannyń qurylýy qala men oblys halqynyń eki esege jýyq ósýine bailanysty, bul mádeni infraqurylymdy keńeitý jáne shyǵarmashylyq qyzmet úshin jańa alańdardyń paida bolý qajettiligin arttyrdy. Jalpy, joba teatr qyzmetteriniń sapasyn arttyrýǵa, shyǵarmashylyq ujymdardyń jumysy úshin zamanaýi jaǵdai qalyptastyrýǵa jáne teatr ónerin odan ári damytýǵa yqpal etetin bolady.
Tarihi-mádeni murany saqtaý memlekettiń mańyzdy mindetteriniń biri retinde QR jańa Konstitýtsiiasynda bekitilgen. Prezident tapsyrmalaryn júzege asyrý aiasynda ótken jyly elimizde 61 mádeni nysan salynyp, 250-den astam mekemege jóndeý jumystary júrgizildi.
