Aqtóbe oblysynda buryn tórt jylǵa bas bostandyǵyn shekteý jazasyna kesilgen Shalqar qalasynyń burynǵy ákimi ózin aqtap shyǵaramyn degen ýádege senip, alaiaqqa 4 million teńge bergen, dep habarlaidy ult.kz.
«Diapazon» gazetiniń málimetinshe, eks-sheneýnik sot úkimimen kelispei, zańgerlik kómek izdegen. Sol kezde týystary oǵan ózin quqyqtyq máselelerdi sheshe alatyn maman retinde tanystyrǵan S. esimdi áieldi usynǵan.
Burynǵy ákim ákesimen birge áieldiń úiine barǵan. Kezdesý barysynda áiel aqtaý úkimin shyǵarýǵa yqpal ete alatynyn aityp, qyzmeti úshin 8 million teńge suraǵan. Er adam suralǵan somanyń jartysyn – 4 million teńgeni qolma-qol bergen.
Bir aptadan keiin áiel istiń sheshilip jatqanyn aityp, aqtaý úkimi shyqqan soń qalǵan aqshany tóleýdi suraǵan. Alaida ýáde oryndalmai, eks-ákim aqtalmaǵan.
Basylymnyń jazýynsha, taraptar arasynda eshqandai kelisimshart jasalmaǵan, aqsha da eshbir túbirteksiz berilgen. Al sotta áiel bul qarajatty qaryz retinde alǵanyn alǵa tartqan.
Tergeý barysynda ózin «advokat» retinde tanystyrǵan áieldiń basqa da alaiaqtyq isterge qatysy bary anyqtaldy. Ol sybailasymen birge azamattarǵa memlekettik jaldamaly turǵyn úi baǵdarlamasy arqyly keiin satyp alý quqyǵymen páter alyp beremiz dep ýáde etken.
Osy shemaǵa sengen jábirlenýshilerdiń biri alaiaqtarǵa elordadaǵy turǵyn úi keshenderinen birneshe páter alyp berý úshin 47 million teńge bergen.
Sot nátijesinde 54 jastaǵy áiel alaiaqtyq jasaǵany úshin alty jylǵa bas bostandyǵynan aiyrylyp, sot zalynda qamaýǵa alyndy. Onyń sybailasy da dál osyndai jazaǵa kesildi. Alaida kámeletke tolmaǵan balasynyń bolýyna bailanysty onyń jazasyn óteý merzimi úsh jylǵa keiinge shegerildi. Sondai-aq sot ekeýin de jábirlenýshilerge keltirilgen materialdyq shyǵyndy óteýge mindettedi.
