Aqmola oblysynda mereitoilyq X «Kazakhstan Jańa Dala / Green Day – 2026» mamandandyrylǵan kórme-demonstratsiiasy qarsańynda «Eń úzdik malshy» mediajobasy iske qosyldy, dep habarlaidy ult.kz.
Joba Jumysshy mamandyqtar jyly aiasynda júzege asyrylyp, mal sharýashylyǵy salasy eńbekkerleriniń bedelin arttyrýǵa jáne olardyń qoǵamdaǵy mańyzdy rólin nasihattaýǵa baǵyttalǵan.
Mediajoba kúndelikti qajyrly eńbegi arqyly aýyl sharýashylyǵynyń damýyna jáne eldiń azyq-túlik qaýipsizdigin qamtamasyz etýge úles qosyp júrgen jandarǵa arnalǵan. Qoishylar, siyrshylar men jylqyshylar – agroónerkásip keshenindegi negizgi mamandyqtardyń ókilderi. Olar ulttyq mal sharýashylyǵynyń ǵasyrlar boiy qalyptasqan dástúrin jalǵastyryp, aýyldyq aýmaqtardyń turaqty damýyna eleýli úles qosyp keledi.
Búginde Qazaqstandaǵy iri qara mal basynyń 45 paiyzdan astamy jeke qosalqy sharýashylyqtarda ustalady.
Sondyqtan júzdegen myń aýyl turǵynynyń ál-aýqaty malshylardyń kásibiligi men adal eńbegine tikelei bailanysty.
Mediajoba aiasynda túsirilim toby Aqmola oblysynyń aýdandaryn aralap, mal sharýashylyǵy salasynda eńbek etip júrgen azamattarmen suhbattar túsirýde. Alǵashqy eki kúnde, iaǵni 25–26 maýsymda, túsirilim toby Atbasar, Bulandy, Býrabai, Esil, Jaqsy jáne Zerendi aýdandarynda boldy.
Joba keiipkerleri ózderiniń eńbek joly, otbasylyq dástúrleri, sharýashylyq júrgizýdiń erekshelikteri, urpaqtar sabaqtastyǵy jáne qazaq dalasyndaǵy aýyl ómiri týraly áńgimeleidi. Barlyq beinematerial ashyq jariialanady, daýys berý arqyly «Eń úzdik malshy» atalymynyń jeńimpazyn anyqtai alady.
Joba jeńimpazy 2026 jylǵy 16–17 shilde kúnderi Aqmola oblysy Tselinograd aýdanynyń Nuresil aýylyndaǵy «Aqtyq» agrofirmasy» aýmaǵynda ótetin mereitoilyq X «Kazakhstan Jańa Dala / Green Day – 2026» kórme-demonstratsiiasy aiasynda marapattalmaq.
