Sot otyrysy kezinde qaza tapqandardyń týysy Ádemi Shylmaǵambetova sóz sóiledi. Onyń aitýynsha, kúdik Naýryz Muqanǵalievke tiesili mal satyla bastaǵan kezde týǵan, dep habarlaidy ult.kz Aqjaiyqqa silteme jasap.
Áieldiń sózinshe, ol inisimen telefon arqyly bailanysa almaǵan, sebebi nómiri óshirýli bolǵan. Soǵan qaramastan WhatsApp arqyly habarlamalar kelip turǵan.
Shylmaǵambetovanyń aitýynsha, ótken jyldyń qarasha aiynan bastap Sultan Sársemaliev Naýryzdyń atynan týystaryna habarlama jazyp otyrǵan. Ol hattarda enesi Násip Óteshqalievanyń aiaǵy aýyryp júrgeni jáne ony emdetý úshin Tashkentke alyp bara jatqany aitylǵan. Sondai-aq em shyǵyndaryna bailanysty otbasy mal satyp jatqany jazylǵan.
Advokattyń suraqtaryna jaýap bergen Shylmaǵambetova Aqbaian Muqanǵalieva eshqashan kúieýinen taiaq jegenin aitpaǵanyn málimdedi.
«Men odan: “Besinshi balańa aiaǵyń aýyr bolyp turǵanda nege ketip barasyń?” dep suradym. Ol ajyrasýǵa Sultannyń basqa áielmen tósekte jatqan sýretin jibergennen keiin sheshim qabyldaǵanyn aitty», – dedi ol sotta.
Sonymen qatar marqumdardyń týysy aiyptalýshynyń Naýryz Muqanǵalievtiń ólimi abaisyzda boldy degen nusqasymen kelispeitinin aitty.
Onyń sózinshe, Naýryz «janjal shyǵaratyn adam emes».
Shylmaǵambetova aldyn ala tyńdalym kezinde Sársemalievtiń «qylmysqa Aqbaiannyń týystarynyń aralasýy sebep boldy» degen málimdemesine de pikir bildirdi.
«Bul tutas bir otbasyn qyryp salýǵa sebep bola ma?» – dedi ol sotta.
