Peterbýrg memlekettik ýniversitetiniń ǵalymdary 2068 jyly Apofis asteroidy Jermen soqtyǵysýy múmkin dep esepteidi. Bul týraly RIA Novosti habarlady.
Ejelgi Egipet qudaiynyń qurmetine atalǵan asteroid 2029 jyly Jerge 38 myń kilometr qashyqtyqta jaqyn ótedi (salystyrý úshin aitsaq, Ai 384 myń kilometr qashyqtyqta ornalasqan).
Jer men asteroid 2044 jyly 16 million kilometrge, 2051 jyly 760 myń kilometrge jáne 2060 jyly 5 million kilometrge jaqyndap, 2068 jyly soqtyǵysýy múmkin.
Apofis Jerge qaýip tóndirip jatqanyn buǵan deiin amerikalyq ǵalymdar málimdegen edi. 2029 jyly jaqyndaǵannan keiin asteroid óziniń orbitasyn ózgertip, kelesi joly qaita oralǵanda Jermen soqtyǵysýy múmkin ekeni anyqtaldy. Ol úshin asteroid "qulyptyń oimasy" — ǵarysh keńistiginiń óte tar aimaǵy arqyly ótýi tiis. Buǵan deiin asteroidtyń osyndai "oimalardyń" biri arqyly ótýi onyń 2036 jyly Jerge qulap ketýine ákelýi múmkin dep esepteldi.
Degenmen ol kezde apattyń yqtimaldyǵy nólge teń dep esepteldi.
Apofis asteroidy 2004 jyly ashyldy. Ǵalymdardyń pikirinshe, onyń diametri shamamen 325 metrdi quraidy. Eger asteroid bizdiń ǵalamsharymyzben soqtyǵyssa, jarylys energiiasynyń qýaty eń qýatty janartaýdyń atqylaýynan asyp túsedi jáne ondaǵan iadrolyq bombanyń jarylysyna teń bolady. Degenmen asteroidtiń qulaýy ǵalamshardyń klimatyna kúshti jáne uzaq áser etpeidi.
