"Qazatomónerkásiptiń" burynǵy basshysy Muhtar Jákishevti shartty túrde merziminen buryn bosatýdan bas tartqan Semei qalalyq sotynyń sheshimine qorǵaýshylar shaǵym túsirgen bolatyn.
Apelliatsiialyq kollegiianyń otyrysy Óskemendegi Shyǵys Qazaqstan oblystyq sotynda 10 qyrkúiekte ótti.
Jákishev pen qorǵaýshylarynyń jeke shaǵymdary qaraldy, dep habarlaidy oblystyq sottyń baspasóz qyzmeti.
"Bul shaǵymdar Semeidiń №2 qalalyq sotynyń 2019 jyldyń 24 shildesindegi Muhtar Jákishevti shartty túrde merziminen buryn bosatý jónindegi ótinishti qanaǵattandyrmaý týraly qaýlysyna túsirilgen edi. Kollegiia qaýlysymen birinshi instantsiianyń sot aktisi ózgerissiz qaldy, jeke shaǵymdar qabyldanbady", - delingen habarlamada.
Sottyń baspasóz qyzmeti túsindirgendei, shaǵymdardyń qabyldanbaýyna Jákishevtiń keltirilgen shyǵyndy (99 mlrd teńgeden astam) áli kúnge deiin ótemeýi negiz bolǵan, al Qapshaǵai qalalyq sotynyń shyǵyndy óteý týraly qaýlysy 2014 jyldyń 15 shildesinde shyqqan edi.
"Osy soma áli kúnge deiin tólenbegen. Sottalǵan azamat shyǵyndy óteý maqsatynda eshqandai shara qabyldamady. Sondai-aq sottalǵan azamattyń minez-qulqynda oń ózgerister baiqalmaidy. Yntalandyrýlardan bólek, Jákishev túrmede tártip buzǵany úshin jazalanǵan. Sottalǵan azamattyń tártipke baǵynǵandyǵyn, minez-qulqynyń túzelgenin kórsetetin eshqandai belgi bolǵan joq", - delingen Shyǵys Qazaqstan oblystyq sotynyń baspasóz qyzmetiniń habarlamasynda.
Baspasóz qyzmeti atap ótkendei, qylmystyq-protsestik zańnamanyń talaptary boiynsha shartty túrde merziminen buryn bosatý úshin sottalǵan azamattyń minez-qulqynyń túzelgenin bildiretin oń ózgerister bolýy tiis.
Eske sala keteiik, Muhtar Jákishev 2009 jyldyń mamyr aiynda iri ýran ken oryndarynda memlekettik úlesti satty degen aiyppen ustaldy. Sot protsesi jabyq rejimde ótti. Sot otyrysy kezinde sottalýshynyń densaýlyǵy syr berýine bailanysty talai ret jedel járdem shaqyrylǵan. 2010 jyldyń naýryz aiynda Jákishev ysyrap jasap, para alǵany úshin aiypty dep tanylyp, 14 jylǵa bas bostandyǵynyn aiyryldy.
Ótken jyly túrmedegi merzimniń jartysynan kóbi ótti. Osyǵan bailanysty Jákishev shartty túrde merziminen buryn bosatýǵa ótinish bildirdi. Alaida Semei qalasynyń soty atalǵan ótinishti qoldaǵan joq.
Byltyr shilde aiynda Jákishevti Semeidegi OV-156/14 koloniiasyna aýystyrdy. Buǵan deiin ol Almaty oblysyndaǵy Zarechnyi aýylynda jáne Qaraǵandy oblysyndaǵy Dolinka eldi mekenindegi túrmede otyrdy.
Advokat Nurlan Beisekeevtiń aitýynsha, túrmede otyrǵan Jákishevtiń densaýlyǵy nasharlap ketti. Ol birneshe aýrýǵa dýshar bolǵan. Biraq áli kúnge deiin tolyqqandy meditsinalyq tekseristen ótpepti. Búginde ol biraz dári iship, emdelýge májbúr. III toptaǵy múgedek týraly anyqtamasy bar.
