Parlamenti Májilisiniń depýtaty Arman Qojahmetov apatty jáne eski turǵyn úilerdi joiý jóninde salalyq baǵdarlama ázirleý kerektigin málim etti, dep habarlaidy QazAqparat.
«Halyqpen pen biliktiń jergilikti atqarýshy organdarymen kezdesýleri kezinde elimizdiń shaǵyn jáne monoqalalarynda qalyptasqan turǵyn úi-kommýnaldyq sharýashylyq salasyndaǵy problemalyq máseleler jii aitylady. Eldi mekenderde apatty jáne tozyǵy jetip eskirgen turǵyn úiler sanynyń kóbeiýi jáne olarda turatyn turǵyndardyń qaýipsizdigi máseleleri halyqtyń jáne jergilikti atqarýshy organdardyń erekshe alańdaýshylyǵyn týǵyzýda. Aitalyq, alynǵan aqparatty taldaý Qazaqstannyń iri qalalaryndaǵy, shaǵyn jáne monoqalalaryndaǵy belgili bir jetistikterge qaramastan, apatty jáne eskirgen turǵyn úilerdi joiý problemasy burynǵysynsha óte ótkir másele bolyp turǵanyn jáne Úkimettiń erekshe nazaryn talap etetinin aiǵaqtap otyr», - dedi Premer-Ministrdiń orynbasary Roman Skliarǵa depýtattyq saýal joldaǵan Arman Qojahmetov.
Depýtat keltirgen resmi aqparat boiynsha 2019 jyly Qazaqstanda 1,3 myń kóppáterli úi apatty jaǵdaida dep tanylǵan. Olardyń biraz bóligi elimizdiń shaǵyn jáne monoqalalarynda ornalasqan.
«Máselen Qaraǵandy oblysynda kóppáterli apatty úiler Qarajal, Jezqazǵan, Temirtaý, Priozersk, Sátbaev qalalarynda ornalasqan. Mysaly Jezqazǵanda qazirgi ýaqytta 25 apatty úi bar. Olardyń 16-sy buzylýǵa jatady. Júzdegen turǵyndar avariialyq turǵyn úide turyp jatyr. Iaǵni olar kún saiyn óz ómirin qaterge tigip otyr. Mundai turǵyndardyń basym bóligi - zeinetkerler, az qamtylǵan azamattar nemese múgedekter. Oblystyń monoqalalaryndaǵy eski turǵyn úidiń sany búkil turǵyn úi qorynyń úshten bir bóligine jetip otyr. Mundai jaǵdai shuǵyl sheshimdi talap etedi», - dedi depýtat.
Shaǵyn qalalarda ekonomikalyq yntalandyrýdyń álsiz bolýy Óńirlerdi damytýdyń 2020 jylǵa deiingi memlekettik baǵdarlamasy men «Nurly jer» baǵdarlamasynda kózdelgen tetikterdi keńinen paidalanýǵa múmkindik bermeitinin atap ótý qajet.
«Máselen halyqtyń satyp alý qabiletiniń shekteýliligin eskere otyryp, Almaty, Atyraý, Pavlodar siiaqty qalalardy qaita jańartýdyń tabysty tájiribesin qoldaný múmkin emes. Bul rette apatty úilerdiń turǵyndary «metrden metrge» qaǵidaty boiynsha jańa páterlerge kóshirilýde. Monoqalalar halqynyń satyp alý suranysynyń shekteýliligine bailanysty qurylys kompaniialary úshin bul nysandar ekonomikalyq turǵydan qundy bolmai otyr. Apatty jáne eskirgen úige jumsalǵan qarajattyń qaitarymdylyǵy negizinde olarǵa kúrdeli jóndeý júrgizý jobalary da monoqalalardyń áleýmettik jáne ekonomikalyq qurylymynyń kúrdeli bolýyna orai qiyndyqtarǵa tap bolýda. Turǵyndar aldaǵy ýaqytta júrgizilgen jóndeý jumystaryn tólei almaityny aiqyn», - dedi ol.
Joǵaryda aitylǵandarǵa bailanysty Arman Qojahmetov Úkimet azamattardyń qaýipsiz ómir súrýin qamtamasyz etý jáne eldegi eskirgen jáne apatty turǵyn úi qoryn joiýdyń mańyzdylyǵyn eskerýi kerektigin jetkizdi.
«Óńirlerdi damytýdyń 2020 jylǵa deiingi memlekettik baǵdarlamasy jáne «Nurly jer» turǵyn úi qurylysynyń memlekettik baǵdarlamasy boiynsha iske asyrylǵan shaǵyn jáne monoqalalardaǵy apatty jáne eski úilerdi joiý jónindegi sharalardyń tiimdiligine taldaý júrgizý kerek. Sondai-aq shaǵyn jáne monoqalalardaǵy apatty jáne eski turǵyn úilerdi joiý jóninde salalyq baǵdarlama ázirleýdiń oryndylyǵy máselesin qaraýdy suraimyn», - dedi depýtat.
