Soltústik Qazaqstan oblysynyń mamandandyrylǵan ákimshilik soty jaqynda murjasy qulaǵan jylý-elektr ortalyǵynyń iesi - «SevKazEnergo» AQ-nyń Tabiǵi monopoliialardy retteý komitetiniń oblys boiynsha departamentine qatysty talabyn qanaǵattandyrmady, dep habarlaidy QazAqparat.
QR Ulttyq ekonomika ministrligi Tabiǵi monopoliialardy retteý komiteti baspasóz qyzmetiniń málimetinshe, atalǵan komitettiń SQO boiynsha departamenti (TMRKD) «SevKazEnergo» AQ-ǵa jospardan tys tekserý júrgizgen. Onyń qorytyndysy boiynsha kompaniia «Tabiǵi monopoliialar týraly» QR zańyn, naqtyraq aitqanda tabiǵi monopoliialar sýbektilerin satyp alý rásimderin saqtamaǵanyn anyqtady.
Budan bólek, TMRKD QR Ákimshilik quqyq buzýshylyq týraly kodeksiniń 164-baby 4-bóligi boiynsha is qozǵady. Bul bap boiynsha 1600 AEK, iaǵni 4,9 mln teńge mólsherinde aiyppul qarastyrylǵan.
«SevKazEnergo» AQ munymen kelispei, SQO mamandandyrylǵan ákimshilik sotyna TMRKD-nyń tekserý nátijeleri týraly aktisin joqqa shyǵarýdy surap, aryz túsirgen.
Alaida, sot «SevKazEnergo» AQ-nyń talap-aryzyn qanaǵattandyrmady.
«SevKazEnergo» AQ-nyń quramyna SQO-daǵy 4 kásiporyn kiredi, olar: «SK REK» AQ, «Petropavl Jylý Jelileri» JShS, «SevKazenergosbyt» JShS jáne biyl qys boiy apattan «kóz ashpaǵan» Petropavldaǵy 2-inshi Jylý-elektr ortalyǵy.
Eske salaiyq, 20 naýryz kúni Petropavldaǵy Jylý-elektr ortalyǵynyń tútin murjasy qulaǵan edi.
Prezident Qasym-Jomart Toqaev SQO ákimine tez arada turǵyndardy jylýmen qamtýǵa tapsyrma berdi.
Qulaǵan murjanyń úiindisi astynda bir jumysshy qalyp, mert boldy.
Osy oqiǵaǵa qatysty qylmystyq is qoǵalyp, JEO direktory jáne bas injener qamaýǵa alyndy.
Keiin «SevKazEnergo» AQ bas direktory da qamaldy.
Bir aptadan keiin, 27 naýryz kúni kásiporynda taǵy da apat bolyp, birneshe qazandyq isten shyqty.
Óńirge kelgen Energetika ministri Bolat Aqsholaqov jaǵdaidy kórip, ortalyqty qalpyna keltirýge 17,5 mlrd teńge kerek ekenin atap ótti.
