Áleýmettik jelide jappai tártipsizdikter barysynda belsendilerdiń óz qyzmetin atqaryp turǵan sarbazdy úgittep jatqany týraly video tarady. Álgi videoda Ulttyq ulan sarbazynyń úgitke kónbei, antyna berik bolǵany kórsetilgen. Jurtty tánti etken bul áskeri - QR Ulttyq ulany «Batys» óńirlik qolbasshylyǵy 6655-áskeri bóliminde leitenant Ulan Myrzabai, dep habarlaidy QazAqparat tilshisi.
«Batys» óńirlik qolbasshylyǵy baspasóz qyzmetiniń jetekshisi, podpolkovnik Erbolat Sultanov málim etkendei, Ulan Myrzabaiǵa qatysty oqiǵa Aqtóbe qalasynda boldy.
Áleýmettik jelide tarap ketken beinejazbany 190 myńǵa jýyq adam qarap, 700-deii áskeri qyzmetshini qoldap, pikir jazǵan. Anyqtalǵanyndai, beinejazba 5 qańtar kúni Aqtóbede túsirilgen bolyp shyqty.
Almaty oblysy Qapshaǵai qalasynyń týmasy Ulan Myrzabai Ulttyq ulanda 2017 jyldan qyzmet etip keledi eken.
Sol kúni olar zańsyz mitingi kezinde Aqtóbe oblysy ákimdigi aldyndaǵy alańda aldyńǵy shepte turǵan.
U.Myrzabaidyń sózine qaraǵanda, bastapqyda bári tynysh bolǵan. Bular mitingige qatysýshylardyń óz talap-tilekterin bildirýine qarsylyq etpegen, qaita qorǵap turǵan. Alaida keibireýleri tártip buza bastaǵan.
«Qoldarynda tas, taiaq, armatýra jáne Molotov kokteili boldy. Aldyńǵy shepte turǵan maǵan birnesheýi jaqyndap kelip, videoǵa túsirip, meni óz jaqtaryna shyǵýǵa úgittedi. Biraq men buiryqtyń aty buiryq ekendigin aityp, áskeri antyma adaldyqtan ainyǵanym joq. Elimiz bizge sendi. Sol senimnen shyǵýdan, Otandy qorǵaýdan artyq abyroi joq», dedi Ulan Myrzabai.
