Qazaqstanda ótken kúni 3031 adamnan koronavirýs tabylǵan. Bul týraly 5 shildede densaýlyq saqtaý ministrligi habarlady. Osylaisha Qazaqstanda koronavirýs pandemiiasy bastalǵannan beri virýs juqtyrǵandar sany boiynsha antirekord ornady.
Onyń aldynda ministrlik elde 3003 adamnan koronavirýs anyqtalǵanyn málimdegen. Elde koronavirýstyń delta varianty tarap jatqan tusta koronavirýs juqtyrǵandar sany ekinshi kún qatarynan úsh myńnan asyp tústi.
Resmi derek boiynsha, Qazaqstanda byltyr naýryzdan beri 436 962 adamnan koronavirýs tabylǵan. Biraq keibir sarapshylar eldegi bul statistika tómen, shynaiy jaǵdaidy kórsete almaidy dep sanaidy.
Qazir elde Nur-Sultan, Almaty, Shymkent qalalary, Aqmola, Atyraý, BQO, Qaraǵandy, Mańǵystaý jáne Pavlodar oblystary qaýpi kóp "qyzyl aimaqta", Aqtóbe, Qostanai, Qyzylorda oblystary virýs taraýy jaǵynan ortasha "sary aimaqta" tur. Qalǵan oblystar "jasyl aimaqta".
3 shildede elde koronavirýs pnevmoniiasyna 82 adam shaldyqty. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 428 adam osy "pnevmoniiaǵa" shaldyqqan.
Senbi, 4 shildede elde 25 adam koronavirýstan, eki adam "koronavirýs pnevmoniiasynan" qaitys bolǵan. Pandemiia bastalǵaly elde 4469 adam koronavirýstan, 3465 adam "pnevmoniiadan" kóz jumdy. Statistikaǵa koronavirýs juqtyrǵan myńnan asa adam marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Ministrliktiń dereginshe, 5 shildege deiin elde 3,7 million adam koronavirýsqa qarsy ekpeniń bir dozasyn; 2,2 milliondai adam eki dozasyn da alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
Qazir elde 31 718 adam Covid dertine shaldyǵyp, emdelip jatyr. 9645 adam aýrýhanada jatyr. 600 naýqastyń jaǵdaiy aýyr, 122 patsienttiń jaǵdaiy óte aýyr, 69 adam jasandy tynys alý apparatyna qosylǵan.
AQSh-taǵy Djons Hopkins ýniversitetiniń esebinshe, álemde 183,7 million adam Covid dertine shaldyqqan. 3,9 million adam qaitys bolǵan.
Aimaqtar boiynsha ótken táýlikte koronavirýs anyqtalǵandar sany:
Nur-Sultan qalasynda - 799,
Almaty qalasynda - 396,
Shymkent qalasynda – 161,
Aqmola oblysynda – 130,
Aqtóbe oblysynda - 69,
Almaty oblysynda - 92,
Atyraý oblysynda - 149,
Shyǵys Qazaqstan oblysynda - 66,
Jambyl oblysynda - 57,
Batys Qazaqstan oblysynda - 186,
Qaraǵandy oblysynda - 499,
Qostanai oblysynda - 54,
Qyzylorda oblysynda - 33,
Mańǵystaý oblysynda - 196,
Pavlodar oblysynda - 87,
Soltústik Qazaqstan oblysynda - 12,
Túrkistan oblysynda - 45.
