Foto: Almaty ákimdigi
Sybailas jemqorlyqqa qarsy is-qimyl agenttigi sport salasyndaǵy jemqorlyq táýekelderine syrtqy taldaý sharalaryna kiristi, - dep habarlaidy Sputnik Qazaqstan.
Agenttiktiń resmi ókili Arman Tileýkenovtyń aitýynsha, Týrizm jane sport ministrliginiń, sonyń ishinde oǵan vedomstvolyq baǵynysty uiymdardyń sportty qarjylandyrý máseleleri jónindegi qyzmetine taldaý júrgizilip jatyr.
"Budan basqa, sporttyq is-sharalar men jiyndar, jabdyqtar men sporttyq taǵamdy satyp alý, sheteldik issaparlardy uiymdastyrý, syiaqylar, sport nysandaryn salý, sondai-aq sport federatsiialary men kásibi klýbtardy ustaý boiynsha biýdjettik jáne biýdjetten tys qarjy kózderi zerdelenetin bolady", - dedi Tileýkenov búgingi brifingte.
Taldaý jumysyna agenttikten bólek múddeli memlekettik organdar men azamattyq qoǵam ókilderi qatysyp jatyr.
"Jemqorlyqqa qarsy qyzmet azamattardy taldaý júrgizýge qatysýǵa shaqyrady. Eger sizde jemqorlyq táýekelderi týraly aqparat bolsa nemese sportty qarjylandyrý salasyn jetildirý boiynsha usynystaryńyz bolsa, olardy elektrondy poshtaǵa (karipova.a@antikor.gov.kz) jiberýińizdi suraimyz", - dep atap kórsetti Tileýkenov.
