Foto: © Sputnik / Abzal Kaliev
Antikor Almaty ákimdigimen birlesip taý bókterindegi aýdandarda jer bólý jáne qurylys salý máselelerinde sybailas jemqorlyq táýekelderine taldaý júrgizip jatyr, - dep habarlaidy "Ult aqparat" vedomstvonyń baspasóz qyzmetine silteme jasap.
Aldyn-ala zertteý qurylystyń barlyq kezeńderinde táýekelderdiń bolýyn kórsetedi. Bul jerdi bólý kezinde sheneýnikterdiń zańsyz áreketterine ákeledi. Nátijesinde fýnktsionaldy aimaqtar men nysanaly maqsatta ózgeredi, kadastrlyq qun tolyǵymen tólenbeidi.
Sáýlet jáne qala qurylysy qyzmeti týraly zańnamany buzý derekteri anyqtalǵan.
"Mysaly, 2017 jyldan bastap jappai demalýǵa jáne týrizmge arnalǵan rekreatsiialyq aimaqtan turǵyn aimaqqa 286 gektarǵa jýyq jer aýdaryldy. Bul ózgerister ekologtardyń, SES pen órt sóndirýshilerdiń kelisiminsiz júzege asyryldy. Qoǵamdyq tyńdaýlar ótkizilmedi. Sonymen qatar, qoldanystaǵy Bas jospar 2011 jyly ózektiligin joidy, al jańasy áli bekitilmegen.
Sonymen qatar, tótenshe jaǵdai qyzmetiniń derekteri boiynsha tasqyn, kóshkin jáne sel qaýpi aimaǵynda 5 000-ǵa jýyq nysan bar. Olarda 26 myń adam turady. Mysaly, Naberejnaia kóshesinde tik betkeidiń astyndaǵy sary topyraqtarynda 12 turǵyn úi salynǵan", - delingen habarlamada.
Sońǵy eki jylda landshaftty zańsyz ózgertýdiń 26 deregi anyqtalǵan.
"Úlgi retinde, Naýryzbai aýdanynyń taý bókterindegi ýchaskelerdiń biriniń iesi ruqsat qujatsyz taýdy kesip tastady. Mamandardyń qorytyndysy boiynsha kesilgen topyraqtyń kólemi 100 myń tekshe metrdi qurady. Bul jerler satý maqsatynda 50 táýelsiz ýchaskege bólingen. Jerdiń nysanaly maqsatyn ózgertý boiynsha memlekettik qyzmetterdi usyný protsesiniń ashyqtyǵy men baqylaýdyń bolmaýy sybailas jemqorlyq praktikasyna alyp keledi.
Aldymen Bas josparǵa sáikes kelmeý jáne seismikalyq jáne sý qorǵaý aimaqtarynda bolý syltaýymen bas tartady. Keiinirek sol ýchaskeler boiynsha ózgertýge kelisim beriledi. Osyndai 900-den astam fakt anyqtaldy", - delingen habarlamada.
Antikor málemetinshe, qala turǵynyna ýchaskelerdiń nysanaly maqsatyn ózgertýge bas tartylyp, biraq biraz ýaqyttan keiin olarǵa ruqsat berilgen. Bul rette onyń ýchaskeleriniń biri ákimdiktiń laýazymdy tulǵasynyń týysyna aýdarylǵan. Osy protsesterge baqylaýdyń bolmaýy biýdjetke tiisti tólemderdiń túspeýine ákep soǵady.
Keiingi úsh jylda aldyn ala derekter boiynsha nysanaly maqsaty ózgergen kezde kadastrlyq qun aiyrmasy úshin 500 million teńgeden astam tólenbegen. Sonymen qatar, tektonikalyq úzilim aimaqtarynda jerler shyǵaryldy. Osylaisha, jeke kompaniianyń biri aýktsion ótkizbesten meditsinalyq ortalyq salý úshin investitsiialyq joba túrindegi Qazaqfilm aýdanynda jer ýchaskesin jalǵa aldy. Keiin aiaqtalmaǵan nysan paidalanýǵa berildi. Almaty turǵyndary arasynda taý bókterindegi aimaqtyń qurylysy erekshe rezonans týǵyzady.
"Ruqsat qujattaryn berý jáne kelisý kezinde sybailas jemqorlyq faktorlary bar ekeni anyqtaldy. Sáýlet organdary jeke úi qurylysynyń eskizin bekitkenimen, is júzinde kóppáterli turǵyn úi kesheni salynady. Bul úilerdi sýǵa jáne jylýǵa qosý úshin qolda bar tehnikalyq sharttar da eskerilmeidi. Mektepter, balabaqshalar, emhanalar, joldar joq. Úilerdiń qabattylyǵy, zirattardan sanitarlyq-qorǵaý aimaǵyn qamtamasyz etý boiynsha talaptar buzylady. Qurylys salýshylar bekitilgen eskizderdi buza otyryp, irgeles aýmaq: trotýarlar, serýendeý aimaqtary jáne balalar alańdary esebinen salynyp jatqan turǵyn úi alańyn ulǵaitady", - dedi Antikor baspasóz qyzmetiniń ókilderi.
Bul zańbuzýshylyqtar boiynsha qylmystyq ister tergelip jatyr. Olardyń sheńberinde laýazymdy tulǵalardyń jaýapkershiligi qaralady. Taldaý jalǵasyp jatyr. Onyń túpkilikti nátijeleri boiynsha atqarýshy jáne ýákiletti organdardyń atyna tiisti usynymdar engiziledi.
