23 qyrkúiekte Túrkiianyń Antaliia qalasynda Abai atyndaǵy saiabaq ashyldy, dep habarlaidy "Ult aqparat" Elshilikke silteme jasap.
Abaidyń 175 jyldyq mereitoiyn merekeleý sheńberinde Qazaqstan Túrkiiadaǵy Elshiligi, Antaliiadaǵy Konsýldyǵy, Qazaqstan jáne Eýraziia halyqtarynyń dostyq pen mádeniet qaýymdastyǵynyń bastamasymen Antaliia qalasynda ornalasqan saiabaqqa Abai Qunanbaiuly esimi berilgen bolatyn.
Saiabaqta Abaidyń mármermen qaptalǵan eckertkish taqtasy ornatylyp, ashylý saltanatyna Qazaqstannyń Túrkiiadaǵy Elshisi Abzal Saparbekuly, Antaliia qalasy Muratpasha aýdanynyń meri Úmit Ýisal, Dúniejúzi qazaqtar assotsiatsiiasy birinshi orynbasarynyń keńesshisi Qarlyǵash Qojamuratova, Qoja Ahmet Iassaýi ýniversiteti Ókiletti keńesiniń Tóraǵa keńesshisi, professor Fyrat Pýrtash, Respýblikalyq Halyq partiiasynyń Antaliiadaǵy tóraǵasy Nýsret Baiar jáne orynbasary Rafet Zeibek, Qazaqstan jáne Eýraziia halyqtarynyń dostyq pen mádeniet qaýymdastyǵy músheleri, jergilikti qonaqtar men BAQ ókilderi qatysty.
Alqaly jiyn barysynda shaǵyn kontserttik baǵdarlama uiymdastyrylyp, Abai shyǵarmashylyǵynan belgili ólenderi oqylyp, án-kúii shyrqalyp, kitaptary syiǵa tartyldy.
Elshi Abzal Saparbekuly óziniń betashar sózinde, Abaidyń 175 jyldyq mereitoiyna arnalǵan bul saiabaqtyń ashylýyna qoldaý kórsetken baýyrlas Túrkiia eline óz alǵysyn bildire otyryp, osyndai halyqaralyq deńgeide atqarylǵan sharalar eki el arasyndaǵy bailanystyń odan ári jaqyndai túsýine óz septigin tigizetinine senim bildirdi. «Túrki áleminiń uly perzenti Abai, qazaq halqynyń temirqazyǵy», – degen A.Saparbekuly, Túrki Keńesiniń Qurmetti Tóraǵasy, Elbasymyz Nursultan Nazarbaevtyń: «Abai óziniń týǵan halqymen máńgi-baqi birge jasaidy, ǵasyrlar boiy qazaq elin, qazaǵyn biikterge, asqar asýlarǵa shaqyra beredi», – degen ónegeli sózin eske saldy.
Uly aqyn murasynyń baýyrlas elde erekshe dáriptelip jatqanyna rizashylyǵyn bildirgen A.Saparbekuly, Qazaqstan Prezidenti Qasym-Jomart Toqaevtyń osy jyly jaryq kórgen maqalasyndaǵy «Qazir aityp júrgen intellektýaldy ult qalyptastyrý ideiasy Abaidan bastaý aldy deýge bolady. Uly oishyl ár sózimen ulttyń óresin ósirýdi kózdedi.», – degen sózderine nazar aýdara otyryp, Abai jolymen júrgen jastardyń, halqymyzdyń jáne jalpy adamzattyń órkendeýi jolynda ólsheýsiz úles qosatyndyǵyna toqtaldy.
Sonymen qatar ashylý saltanatynda sóz sóilegen Antaliia, Muratpasha aýdanynyń meri Úmit Ýisal, saiabaqqa Abai esimin berý qazaq jáne túrik halyqtarynyń rýhani ári mádeni jaqyndyǵyn kórsetken mańyzdy is-shara ekenin atap ótti. «Abai esimi túrik álemin birlikte ustaityn uly esimderdiń biri» ekenin aita otyryp, eki el arasyndaǵy birlik ben yntymaqtastyqqa ózindik úles qosatynyn jetkizdi.
