Mýzykalyq shyǵarmalardy oryndaýshylar fonogramma qoldanatynyn kórermenge habarlaýǵa mindetti bolady. Bul týraly Májilistiń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy QazAqparat.
«Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» Qazaqstan Respýblikasy zań jobasynyń maqsaty qoldanystaǵy zańnamany jetildirý jáne mádeniet salasyn damytý úshin qolaily jaǵdailar jasaý bolyp sanalady. Joba qamtyǵan negizgi baǵyttar – kitaphana jáne baspa isi, mádeni-kópshilik is-sharalardy retteý máseleleri jáne shyǵarmashylyq odaqtardy qoldaýǵa qatysty túzetýler bolyp otyr. Joba «Ulttyq arhiv qory jáne arhivter týraly», «Mádeniet týraly» jáne «Memlekettik múlik týraly» Qazaqstan Respýblikasynyń zańdaryna túzetýler engizýdi kózdeidi jáne túzetýlerdiń negizgi blogy mádeniet salasyna qatysty», - dedi zań jobasyn tanystyrǵan ministr.
Osy rette ol 2007 jyldan bastap Qazaqstan Respýblikasynyń Ulttyq akademiialyq kitaphanasy bazasynda Qazaqstan ulttyq elektrondyq kitaphanasynyń jobasy iske asyryrylyp kele jatqanyna toqtaldy.
«Sonymen qatar, búginde elimizdiń elektrondyq kitaphanasyn irikteý, qalyptastyrý, tolyqtyrý jáne damytý tártibin aiqyndaityn zańnamalyq baza joq. Qazaqstan Respýblikasynyń mádeni qundylyqtary men ulttyq mádeni igiligin elektrondyq formatta saqtaý baǵytynda aitylǵan olqylyqtardy joiý, sondai-aq halyqtyń ziiatkerlik áleýetin arttyrý jáne qazaqstandyq ǵylym men mádenietti tanymal etý boiynsha jaǵdailardy arttyrý maqsatynda zań jobasynda elektrondyq kitaphana máselelerin retteitin normalar kózdelip otyr», - dedi Aqtoty Raiymqulova.
Sonymen qatar, ministr kontsert, oiyn-saýyq is-sharalaryn ótkizý kezinde týyndaityn birqatar problemalar bar ekendigin jasyrmady. Oryndaýshylar tarapynan kontsertter ótkizý kezinde ádepsiz minez-qulyq kórsetý, sahnada mas kúiinde óner kórsetý úrdis oryn alǵan, josparlanǵan kontsertterdi buzý, ádepsiz sózderi bar repertýar tańdaý, kórermenderdi habardar etpei fonogrammany paidalaný faktileri bolǵanyn ashyq aitty.
«Osy oraida, Zań jobasy aiasynda oryndaýshylardyń osyndai minez-qulyq kórsetýine jol bermeý úshin birqatar mindettemelerdi engizý arqyly osy máselelerdi retteýge tyrystyq. Olardyń ishinde mańyzdy normalardyń biri - mýzykalyq shyǵarmalardy oryndaýshylardyń fonogrammalardy qoldanýy týraly kórermendi habarlaý. Fonogrammalardy paidalaný tártibin zańǵa táýeldi aktide aiqyndalatyn bolady. Barlyq jarnamalyq ónimderde jáne kassalar janynda mindetti túrde fonogrammany paidalaný boiynsha habarlama beriledi. Bul kórermenge fonogrammany paidalanýmen ótetin kontsertke bilet satyp alý nemese odan bas tartý tańdaýyna múmkindik beredi jáne bilettiń qunyna da áser etedi», - dedi ol.
