Foto: aliokapov/Instagram
Belgili ánshi Áli Oqapov kútpegen málimdeme jasady. Ol áleýmettik jelidegi shýdan soń barlyq marapatynan bas tartty, - dep habarlaidy "Ult aqparat".
«Qadirli dostar, áriptester jáne osy beinejazbany kórip otyrǵan jandar.
Sońǵy oqiǵalar osylai qyzý talqylanady dep kútpedim. Biraq eshteńeni baiqamaǵandai, eshteńege mán bermegendei júre almaimyn. Osy video arqyly men 32 jyl ǵumyrymda telearnalar men radiostantsiialardan, qoǵamdyq uiymdardan, jeke jobalardan alǵan barlyq mýzykalyq marapattan bas tartatynymdy jetkizgim keledi. Muny baiaǵydan jasaǵym kep júr edi, sebebi kishkentai ulyma jeke bólme qajet, al kabinettiń sórelerinde turǵan temir júldeler ol úshin óte qaýipti. Endi, mine, osyny jasaýdyń sáti tústi.
Memlekettik nagradalarǵa kelsek, olarda QR Memlekettik rámizderi bolǵandyqtan, bul jerde jaǵdai kúrdeli. Men zańdardy zerttep, qaitarý normativteri týraly izdendim. Alaida eshteńe de tappadym. Mundai norma joq. Menińshe, bulai eshkim jasamaǵan. Sol sebepti bul nagradalar ýákiletti organnyń sheshimin kútedi. Sheshim qandai bolsa, solai jasaimyn. Iaǵni menen talap etiletin nárseniń bárin isteýge daiynmyn" - deidi ánshi.
Sonymen qatar Áli Mádeniet jáne aqparat ministrligine alǵys bildirdi.
"Marapat berýge atsalysqan adamdarǵa alǵys aitamyn. Men eshteńe suraǵan joqpyn, tipti, bilmedim. Erteń marapattaý rásimine qatysýym kerek ekenin túnde habarlady. Marapattaýǵa kelgen kezde de ne kútip turǵanyn bilmedim. (...)
Jalpy, ártis úshin halyqtyń qoshemetinen joǵary marapat joq dep oilaimyn.
Men - baqytty adammyn. Otbasym, mýzykam, tyńdarmanym bar.
Al eń úlken marapat pe ataǵymdy 17 aqpanda - áke atanǵan kezimde aldym. Sol atqa laiyq bolýǵa tyrysamyn. Jalpy, eger de men bireýdi renjitken bolsam, keshirim suraimyn, olai bolǵanyn qalaǵan joqpyn. Sondai-aq meni jaqtap jatqan jandarǵa alǵysym sheksiz.
Shynymdy aitsam, jahandyq deńgeide qorqynyshty eshteńe de bolmady. Qudaiǵa shúkir, eshkim zardap shekken joq. Tarihtyń bul paraǵynan ótip, shynymen de mańyzdy suraqtar men máselelerge nazar aýdara alamyz.
Men jaspyn, bári alda dep úmittenemin. Bálkim, osy rólge sáikes kelmeitin shyǵarmyn, bul da qalypty jaǵdai. Sondyqtan Tasqyn Oqapovtyń, Roza Rymbaevanyń uly, ári qarapaiym pop-oryndaýshy retinde keshirim suraimyn. Barshańyzdy qushaqtadym, alǵysymdy bildiremin", - dep túiindedi ánshi.
Eske salaiyq, keshe ǵana Áli Oqapov "Qurmet" ordeniniń iegeri atanǵan bolatyn. Bul jáitqa bailanysty jeli qoldanýshylary ártúrli pikir qaldyrǵan.
"Búgin "Qurmet" ordeniniń iegeri atandym! Shynymen kútpegen jaǵdai boldy. Árine, kóp raqmet! Osy ataqqa laiyq eńbek etýge, maǵan artqan senimdi aqtaýǵa barymdy salamyn. Quttyqtaýlaryńyzǵa raqmet! Basymdy iemin!", - dep jazdy ánshiniń ózi.
Foto: aliokapov/Instagram
