Elordada «Ańsaǵan sábi» baǵdarlamasy aiasynda biyl bólingen 486 kvotanyń 276-sy boiynsha patsientter ana bolýǵa daiyndalýda. Bul týraly «Áleýmettik meditsinalalyq saqtandyrý qory» KEAQ Nur-Sultan qalasy boiynsha filialynyń baspasóz qyzmetinen málim boldy, dep habarlaidy QazAqparat.
«Áleýmettik meditsinalyq saqtandyrý qory EKU baǵdarlamasyn 2018 jyldan qarjylandyryp keledi, 2018 jyly TMKKK aiasynda 902 tsikl, 2019 jyly da osy kólemde qarjylandyryldy. Ótken jyly 1105 EKU qyzmeti kórsetildi. Biyl jasandy uryqtandyrý sharalaryn jasaýǵa bólinetin kvota sany 2020 jylmen salystyrǵanda 7 ese ósti. 2021 jyly Meditsinalyq saqtandyrý qory aldyn ala 6,2 mlrd teńge somasyna 7000 ekstrakorporaldy uryqtandyrý (EKU) tsiklyn qarjylandyrýdy josparlaǵan bolatyn. Biyl elordaǵa 486 kvota bólindi», – delingen habarlamada.
DDSU málimetteri boiynsha, reprodýktivti tehnologiiany qoldaný arqyly júrgizilgen sharalar nátijesinde 45-60 paiyz jaǵdaida áielder bala kóteredi. Bizdiń elimizde EKU júrgizý tiimdiligi orta eseppen 15%-dan 42% -ǵa deiin ósti. Bala týý (take baby home) faktisi boiynsha emdeý tiimdiliginiń kórsetkishi 30% deńgeiinde, bul eýropalyq eń jaqsy degen klinikalardyń kórsetkishine sáikes keledi.
Qazaqstanda EKU baǵdarlamasyna 2021 jyly bólingen kvota sany 7000-ǵa deiin kóbeidi. Bul kvota berý kórsetkishterin keńeitýge, olardy alý kezeginiń azaiýyna múmkindik beredi. Búginde elimizde 11030 áiel bedeýlikpen esepte tur.
«Nur-Sultan qalasynda bedeýlik boiynsha esepte turǵandar sany – 1331. Bizdiń áiel densaýlyǵy bólimshesi Nur-Sultan qalasy boiynsha QRT kórsetý – EKU-ǵa daiyndaý jónindegi úilestirý ortalyǵy bolyp sanalady. Biylǵa elordaǵa 486 kvota bólindi. Qazirgi ýaqytta 276 kvota berilip, patsientter daiyndalýda. Osy jyly bastapqy meditsinalyq-sanitarlyq kómek kórsetý uiymdary buryn esepke turmaǵan jáne jeke meditsina ortalyqtaryna qaralǵan bedeýlik kórsetkishteri bar patsientterdi anyqtap, belsendi jumys júrgizýde» - deidi Nur-Sultan qalasyndaǵy №2 qalalyq kópbeiindi aýrýhana direktorynyń ambýlatoriialyq qyzmet jónindegi orynbasary Sáýle Ibraeva.
EKU úshin kimder ótinish bere alady?
Bul emshara terapiialyq jolmen emdeý nátije bermeitin bedeýlik diagnozy qoiylǵan patsientterge arnalǵan. EKU-ǵa otbasylyq juptar da, jeke adam da qatysa alady. Mindetti túrde úmitkerdiń erikti jazbasha kelisimi bolýy kerek. Sondai-aq, Qazaqstan azamaty bolýy jáne Densaýlyq saqtaý ministrligi belgilegen meditsinalyq parametrlerge reprodýktivti jasy (18-den 42 jasqa deiin), qalypty somatikalyq jáne endokrindik mártebeleri, jetkilikti ovarialdy rezervi sáikes kelýi qajet.
Jatyrdyń týa bitken nemese júre bitken aýytqýlary, somatikalyq jáne psihikalyq aýytqýlar, analyq bez isikteri, jedel qabyný jáne kez-kelgen lokalizatsiia onkologiiasy bolǵan jaǵdailarda ǵana mamandar naýqasty ekstrakorporaldy uryqtandyrýdan bas tartýy múmkin.
EKU-ǵa joldama alý úshin ne isteý kerek?
EKU-ǵa joldama alý úshin aldymen tirkelgen jeri boiynsha emhanaǵa barý qajet. Uiym mamandary patsientti bedeýligi bar dispanserlik patsientterdiń elektrondyq tirkelimine qosady jáne birqatar tekserýler taǵaiyndaidy. 12 ai ishinde bastapqy meditsinalyq-sanitarlyq kómek kórsetý uiymy, iaǵni emhana beiindi mamannyń qorytyndysy negizinde patsienttiń qujattaryn joǵary tehnologiialyq meditsinalyq qyzmetter jónindegi jergilikti komissiiaǵa jiberedi. Oń sheshim qabyldanǵan jaǵdaida, áieldi «Emdeýge jatqyzý biýrosy» portalyna tirkep, emsharaǵa daiyndai bastaidy. Patsient ekstrakorporaldy uryqtandyrý úshin klinikany óz betinshe tańdaýǵa quqyly.
MÁMS boiynsha EKU protsedýrasynan jylyna bir ret tegin ótýge bolady. MÁMS júiesinde EKU emsharasyn jasar aldynda erli-zaiyptylardy tekserý tizbege sáikes júzege asyrylady. MÁMS júiesinde EKU – tsikldiń bazalyq baǵdarlamasy qarastyrylǵan.
