Túrkiiadaǵy Resei elshisi Andrei Karlovqa 19 jeltoqsan kúni Ankara qalasynda qastandyq jasaldy. Túrkiialyq NTV telearnasynyń habarlaýynsha, kórkemsýret galereiasy ishinde "Ankara politseii Mevliýt Mert Altintash" dep sipattalǵan shabýyl jasaýshy Karlovqa oq atqan.
Hurriyet gazetiniń aǵylshyn tildi vebsaitynyń jazýynsha, elshi Andrei Karlov galereiada ótken mádeni sharada sóz sóilep turǵanda oq tiip jaralanǵan. Keiin belgili bolǵandai, ol kóp uzamai aýrýhanada kóz jumǵan. Qastandyqtan soń ǵimaratty Túrkiianyń arnaiy jasaǵy qorshap aldy. Politseiler oǵan shabýyl jasaǵan adamnyń kózin joiǵan.
Resei SIM ókilderi Túrkiiadaǵy elshiniń qastandyqtan qaza bolǵanyn rastap úlgerdi. "Bul kún - Resei Federatsiiasynyń tarihyndaǵy qasiretti kúnderdiń biri. Ankarada qoǵamdyq is-sharada Resei Federatsiiasynyń elshisi Andrei Karlovqa qastandyq jasalyp, ol qaza tapty", - dep habarlady Resei SIM resmi ókili Mariia Zaharova.
Ol Andrei Karlov qaza tapqan Ankarada bolǵan oqiǵany "terroristik akt" dep atady. "Oqiǵany "terroristik akt" dep tanimyz. Túrik resmi ókilderimen bailanystamyz, olardan jan-jaqty tergeý júrgiziletini jaily habar aldyq", - dedi SIM ókili.
Sonymen qatar, túrik biliginiń Reseidiń Ankaradaǵy elshiliginiń kúzetin kúsheitkeni habarlanyp otyr.
Al Memlekettik dýmanyń ókilderi RF-nyń Túrkiiadaǵy elshisine jasalǵan shabýyldy eki eldiń arasyndaǵy qarym-qatynasty buzý úshin jasalǵan dep málimdep, osy qylmysty jan-jaqty tergeýge alý kerek ekenin atap ótti.
Resei men Túrkiia - Siriiadaǵy azamattyq soǵysqa aralasqan elder. Bes jarym jyldan astam ýaqytqa sozylǵan soǵys kezinde Resei Siriianyń avtokrat prezidenti Bashar Asadty qoldap, byltyr oppozitsiialyq kóterilisshilerge qarsy ásker kirgizdi. Túrkitildes az sandy etnostardyń qaýipsizdigin saqtaý degen jeleýmen Túrkiia da Siriiaǵa ásker kirgizip, shekaranyń eki betindegi kúrd jasaqtaryna qarsy operatsiia júrgizip jatyr. Elden eki million siriialyq bosyp ketti.
Birqatar jetekshi álemdik BAQ-tyń jazýynsha, "elshige túrik politsei Reseidiń Aleppodaǵy is-áreketi úshin shabýyl jasaǵanǵa uqsaidy". Óner galereiasynda jasalǵan shabýyl kezinde birneshe adam jaralanǵan. Bir kún buryn Túrkiiada Reseidiń Siriia prezidenti Bashar Asadty qoldaǵanyn aiyptaǵan qoǵamdyq narazylyq aktsiiasy ótken.
Diplomattyń denesi jetkizilgen aýrýhana aldynda jýrnalisterge suhbat bergen Ankaranyń meri Melih Gokchek "bul qastandyq Túrkiianyń Reseimen qarym-qatynasyn buzýdy kózdegen" dedi.
Ult portaly
