Foto: 24.kz
Túrik eliniń astanasy Ankarada Qazaqstannyń Respýblika kúnine arnalǵan saltanatty qabyldaý keshi ótti, dep habarlaidy «Ult aqparat» 24kz-ke silteme jasap.
Oǵan ziialy qaýym men sheteldik diplomatiia ókilderi jáne Túrkiiada turatyn qandastarymyz qatysqan. Qazaqstannyń Túrkiiadaǵy elshiligi uiymdastyrǵan merekelik is-sharada án-kúiden bólek, qazaqy dastarhan da jaiyldy. Qonaqtarǵa kiiz úide ulttyq taǵamdar usynyldy. Keshke Túrkiia Uly Ulttyq májilisiniń tóraǵasy Nýman Kýrtýlmýsh qatysyp, Atajurttaǵy týys jurtty Respýblika kúnimen quttyqtady.
Nýman Kýrtýlmýsh, Túrkiia uly ulttyq májilisi tóraǵasy:
- Qazaqta mynadai sóz bar: «Birlik bolmai, tirlik bolmas» degen. Túrki memleketteri arasyndaǵy osy yntymaqtastyqty kún saiyn nyǵaityp, jolymyzdy jalǵastyryp kelemiz. Sonymen qatar Qazaqstannyń áigili tulǵalarynyń biri, Berlindegi Túrik Sheiittiginde jatqan Mustafa Shoqaidyń «Ár túrkiniń birinshi óz Otany bolsa, ekinshisi – Túrkiia» degen mańyzdy sózi bar. Qazaqstannyń, Túrkistannyń, Qoja Ahmet Iasaýidiń rýhani murasy álemge taralǵan jerdiń dos jáne baýyrlas halyqtarymen birge ulttyq merekede bolǵanyma qýanyshtymyn. Túrkiia men Qazaqstan arasyndaǵy dostyq máńgilik bolsyn.
Týrgai Ýzýn, Osmanie Qorqyt ata ýniversitetiniń rektory, professor:
- Qazaqstan da bizdiń Otanymyz. Sondyqtan bul – qutty kún. Baýyrlarymyzdyń qýanyshyn bólisý úshin Osmanie qalasynan arnaiy keldim. Tilimiz, tarihymyz ben salt-dástúrimiz bir. Bul birlikti bolashaqqa da aparmaqpyz. Qazaq-túrik qarym-qatynasy kún saiyn qaryshtap damyp keledi. Barlyq salada yntymaqtastyǵymyz joǵary. Ony odan saiyn nyǵaitý úshin Túrkiia biligi baryn salyp otyr. Respýblika kúnimiz qutty bolsyn! Qýatty Qazaqstandy kórý bizdi árqashan da qýantady.
