Siriianyń soltústigindegi ál-Rai qalasynda júrgen túrik áskeri tehnikalary. 2 naýryz 2017 jyl.
Túrkiia Siriianyń soltústigindegi "Evfrat qalqany" dep atalatyn áskeri operatsiiasyn aiaqtaǵanyn habarlady. Biraq Ankara Siriiadan áskerin shyǵarý jospary bar, ia joǵyn aitpady. Túrkiia premer-ministri Binali Iyldyrym 29 naýryzda operatsiianyń "tabysty aiaqtalǵanyn" málimdedi. Degenmen ol jaqyn keleshekte Siriiada jańa operatsiia júrgizý múmkindigin joqqa shyǵarmady.
Ótken jyly tamyzda bastaǵan "Evfrat qalqany" operatsiiasynda túrik jaiaý áskeri, tankteri men aviatsiiasy Siriianyń Túrkiiamen shekaralas aýdandarynda "Islam memleketi" ekstremistik uiymy sodyrlarymen soǵysyp jatqan "Siriia erikti armiiasynyń" (FSA) kóterilisshilerine qoldaý kórsetken. FSA kúshteri sonymen qatar Ankara "terrorist" dep ataityn kúrd kóterilisshilerimen de soǵysyp jatyr.
"Endigide, IM nemese basqa qandai da bir uiymdardan qaýipsizdigimizge qater tóngen jaǵdaida jańa áskeri operatsiia bastalady" dedi Iyldyrym.
Túrkiia men AQSh Siriiada prezident Bashar Asad biligine qarsy túrli fraktsiialardy, al Resei men Iran Asadty qoldaidy. AQSh-tyń kúrd jasaqtaryn, onyń ishinde "Siriianyń demokratiialy kúshteriniń" (SDF) áskeri qanaty - "Halyqtyq ózin-ózi qorǵaý otriadtary" (YPG) kúshterin qoldaýyna bailanysty Vashington men Ankara arasynda Asadqa qarsy turý máselesinde ortauq ustanym joq.
Túrkiia biligi "Evfrat qalqany" operatsiiasyna qansha áskeri qatysqanyn eshqashan jariia etpegen. Túrkiia Siriiamen shekaralas aýdandarynda áskerin áli ustap otyr.
