Qazaqstan Ulttyq Olimpiada komitetiniń bas hatshysy Andrei Kriýkov Tokio Olimpiadasynyń búgingi jarys kúnin qorytyndylap, pikir bildirdi, dep habarlaidy QazAqparat.
«Áýeli búkil qazaqstandyqtardy Eldostyń jeńisimen quttyqtaǵym keledi. Bul – Tokio Olimpiadasyndaǵy alǵashqy medalimiz. Osy medal basqa jeńisterge jol ashady dep senemiz. Eldos búgin óziniń sheber ekenin, kásipqoi ekenin kórsetti. Jarys jolynda sońyna deiin kúresti. Osyndaǵy sportshylardyń bárine ol búgingi ónerimen úlken baǵyt siltep ketti dep oilaimyn. Endi olar da alańsyz alǵa umtylatyn bolady. Qola júlde úshin ótken sońǵy beldesýinde ol qarsylasyn utýǵa kúsh taba bildi. Óitkeni bári «aqtyq beldesý» dep baǵa bergen jartylai finaldaǵy aiqasy óte qiyn bolǵan edi. Sporttaǵy jerebe osylai túsip jatty. Biz kez kelgen oiyn erejesin qabyldaimyz. Eldos búgin taǵy da óziniń jeńisti dástúrin jalǵastyra alatynyn kórsetti. Búgin ol elimizdegi eń dańqty dziýdoshyǵa ainaldy. Osy múmkindiktiń Olimpiada oiyndarynyń alǵashqy kúni tirkelgenine qýanyshtymyn», - dedi komitet hatshysy Ortalyq kommýnikatsiialar qyzmetinde Japoniiadan tikelei bailanysqa shyǵyp.
Bas hatshy búgin qazaqstandyq veloshabondozdardan da medal kútkenin jasyrmady.
«Bul oiyndarda osal qarsylas joq ekenin aitqym keledi. Komandalardyń bári tas-túiin daiyndyqpen kelgen. Sportshylardyń bári babynda. Dziýdo boiynsha, basqa da sport túrleri boiynsha ótken týrnirlerde oǵan kóz jetkizdik. Biz úshin dramaǵa toly bolǵan velojarysta jigitterimiz júldegerler qataryna ilige almaǵanyn kórdik. Tennis týrnirinde de finalǵa jete almadyq. Sonda da bárimiz sportshylardy qoldaimyz. Komanda jaqsy babynda jáne rýhy kóterińki», - dedi Andrei Kriýkov.
Eske salsaq, búgin Tokio tórindegi tatamide 60 keli salmaq boiynsha beldesken Eldos Smetov Qazaqstan qorjynyna alǵashqy medaldi salǵan bolatyn.
