Qazaqstandyq jas ánshi Erjan Maksim «Evrovidenie» baiqaýyna arnalǵan ániniń tusaýkeserinde armany týraly aitty, dep habarlaidy QazAqparat.
«Men Andrea Bochelli siiaqty bolǵym keledi (italiandyq ánshi, klassikalyq jáne tanymal mýzyka oryndaýshysy – red.avtor). Shynynda, maǵan klassika unaidy», - deidi Erjan.
Oraldyq 12 jasar ánshi Reseidiń «Golos» jobasyna qatysyp, jeńipaz atanǵannan keiin tanymal boldy. Qazir ol ata-anasymen birge Máskeýde turady. Igor Krýtoidyń mýzyka akademiiasynda oqidy.
«Bizdiń Máskeýde turyp jatqanymyzǵa eki ai boldy. Akademiiada akterlik sheberlik, horeografiia, vokaldy oqimyz. Igor Krýtoi akademiiaǵa kóp kelmeidi. Biraq onda jaqsy oqytýshylar bar. Men bul akademiiada 5 jyl oqimyn, sodan keiin Italiiaǵa barǵym keledi», - deidi ánshi.
Az ǵana ýaqyt ishinde Erjan Máskeýden ózine dostar taýyp úlgergen. Alaida ol úlken qalaǵa úirene almai jatqanyn jasyrmady.
«Iá, men áli kúnge deiin úirene almai júrmin. Dostarym bar. Biraq men Oraldaǵy dostarymdy saǵyndym. Sondai-aq, ózimizdiń ulttyq taǵamdardy saǵyndym. Men qazyny jaqsy kórem. Sondyqtan anam úide kóbine et asady. Sorpa ázirleidi», - dep tolyqtyrdy Erjan.
Aita keteiik, 24 qarasha kúni Polshada ótetin «Balalar Eýrovideniesi-2019» baiqaýynda Qazaqstannyń namysyn Erjan Maksim qorǵaidy. Búgin onyń baiqaýda oryndaityn «Armannan qalma!» («Don’t forsake your dream») ániniń tusaýkeseri ótti.
