Ándi jandy daýyspen aitqan durys. Mundai pikirdi Májilistiń jalpy otyrysynda palata tóraǵasy Nurlan Nyǵmatýlin bildirdi, dep habarlaidy "Ult aqparat".
«Menińshe, naǵyz óner ol – aitys. Aitysqa fonogrammamen shyǵyp kórińizshi. Onda eshqashan, eshqandai fonogramma bolmaidy. Sol úshin shyǵar, halqymyz osy aitysty jaqsy kóredi. «Qisyq arba jol buzady» dep halqymyz aitqandai, óner árqashan da taza bolýy kerek. Ándi jandy daýysta aitqan durys. Al fonogramma bolsa, onda ony aldyn ala eskertý qajet jáne bilettiń baǵasy da soǵan sáikes bolýy tiis. Odan keiin halyq ol kontsertke baratynyn ne barmaitynyn ózi sheshedi. Árine, kontsert jandy daýysta bolsa ánshige halyqtyń baǵasy da qurmeti de joǵary bolady», - dedi Nurlan Nyǵmatýlin.
Aita keteiik, jalpy otyrysta QR Mádeniet jáne sport ministri Aqtoty Raiymqulova «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» Qazaqstan Respýblikasy zańy jobasyn tanystyrǵan bolatyn. Qujatta mýzykalyq shyǵarmalardy oryndaýshylardyń fonogrammalardy qoldanýy týraly kórermendi habarlaýy týraly norma kózdelgen.
