QR Memlekettik qyzmet isteri agenttiginiń tóraǵasy Anar Jaiylǵanova men BUU qurylymynyń ókilderimen Qazaqstandaǵy genderlik teńdik, áielderdiń quqyqtary men múmkindikterin arttyrý máseleleri boiynsha kezdesý ótkizdi. Bul týraly Memlekettik qyzmet isteri agenttiginiń baspasóz qyzmeti habarlady.
Kezdesýde genderlik teńdik, eldiń saiasi, ekonomikalyq jáne áleýmettik ómirine áielderdiń belsendi qatysýy úshin teń múmkindikter jasaý máseleleri talqylandy. Anar Jaiylǵanova elimizde genderlik-baǵdarlanǵan kadrlyq saiasat júrgizilip jatqandyǵy, barlyq deńgeide qyzmet boiynsha alǵa jyljý úshin teń bastapqy múmkindikter jasalǵanyn, stereotipterdi eńserý maqsatynda genderlik aǵartý jumystary iske asyrylatynyn atap ótti.
«Elbasy saiasatyn júzege asyrýdy jalǵastyra otyryp, Memleket basshysy óziniń «Igilik barshaǵa! Sabaqtastyq. Ádildik. Órleý» sailaýaldy baǵdarlamasynda áielderdiń eńbek quqyqtaryn qorǵaýdy qamtamasyz etý, genderlik belgisi boiynsha kemsitýshilikke jol bermeý, jumyspen qamtýdyń ikemdi nysandaryn engizý, sondai-aq olardyń barlyq deńgeilerde jáne korporativtik sektorda memleketti basqarýǵa qatysýyn keńeitý mańyzdylyǵyn atap ótti. Qazirgi tańda áielder sheshim qabyldaýdyń joǵary deńgeiinde - Parlament depýtattary, Úkimet músheleri, Konstitýtsiialyq Keńes pen Ortalyq sailaý komissiiasy, óńirlerdegi ákimderdiń orynbasarlary laýazymdarynda jáne memlekettik basqarýdyń barlyq satylarynda qyzmet atqarady», – dep atap ótti tóraǵa.
Óz kezeginde Qazaqstandaǵy «BUU – Áielder» qurylymynyń ókili Ilein Konkievich hanym Qazaqstandaǵy «BUU-áielder» qurylymynyń aǵymdaǵy jobalary, olardy iske asyrý barysy týraly aqparatty usyndy.
Onyń aitýynsha, Prezident Qasym-Jomart Toqaev memlekettik jumyspen qamtý saiasatynyń basty baǵyttarynyń biri retinde genderlik teńdikti nyǵaitýdy aiqyndaǵany qýanyshty.
Ilein Konkievich olardyń jynystyq tiistiligine qaramastan, azamattardyń resýrstary men múmkindikterine teń qol jetkizýdi qamtamasyz etýdiń birlesken sharalaryn qabyldaý qajettigin atap ótti.
Aitalyq, Ilein Konkievich hanym adam quqyqtary men zańnyń ústemdigi, genderlik máseleler, demokratiialyq institýttardy damytý, qaishylyqtardy retteý jáne preventivti diplomatiia salasynda 25 jyldan astam jumys tájiribesi bar halyqaralyq damý salasyndaǵy tájiribeli maman bolyp tabylady.
MQIA Tóraǵasy kezdesýge qatysýshylardy genderlik teńdikti qamtamasyz etý boiynsha Agenttik tarapynan qabyldanyp jatqan sharalar týraly habardar etti.
«Agenttik áielderdi kóshbasshylyq qasietterge oqytý boiynsha sharalar qabyldaýda, dekretten jumysqa shyǵý, qashyqtyqtan jumys múmkindikteri qarastyrylýda, jumys ýaqytynyń ikemdi kestesi engizildi, ákeler úshin balany kútý boiynsha demalystardy dáripteýge jeke nazar aýdarylýda», - dep atap ótti A.Jaiylǵanova.
Taraptar maqsattardy, mindetterdi jáne maqsatty indikatorlarǵa qol jetkizýdi aiqyndai otyryp, memlekettik basqarý júiesinde áielder jáne erler úshin teń quqyqtar men múmkindikterdi qamtamasyz etý máseleleri boiynsha belsendi yntymaqtastyq týraly kelisti.
