Qazaqstannyń Joǵary oqý oryndaryndaǵy filologiialyq bilim berý júiesine reforma kerek. Qazaq tilin jańǵyrtý isine qatysty Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynyń ǵalym hatshysy, filologiia ǵylymdarynyń kandidaty Anar Fazyljanova osyndai pikir bildirdi, dep habarlaidy QazAqparat.
«Eń aldymen, filologiialyq bilim berý júiesine reforma kerek. Qazaqstandaǵy filologiia fakýltetterin bitirgen stýdentter men magistranttardy kúnde kózimiz kóredi. Olardyń alǵany – klassikalyq filologiialyq bilim. Odan ary ketpeidi. Al qazirgi kezde kommýnikatsiia qubylyp, ózgerip turady. Kommýnikanttardyń talaptary da qubylmaly. Soǵan qarai filologiia mamandyǵyn bitirgen maman tildi durys ári sapaly qoldana alýy kerek», - dedi maman elordadaǵy Prezidenttiń Ulttyq qoǵamdyq senim keńesindegi qazaq tilin jańǵyrtýǵa bailanysty aitqan oilary negizinde uiymdastyrylǵan jiynda.
Onyń aitýynsha, negizgi pánderdiń mazmunyn da ózgertý kerek.
«Mysaly, qazir sintaksisten klassikalyq bilimderdi beremiz biz. Sóilemniń qurylysy, sóilem músheleri mektepte de, JOO-larda da oqytylady. Al endi qazirgi sintaksis qandai bolý kerek. Kommýnitsiianyń alýan túrli salasynda sintaksis qandai bolý kerek degen máselege bas qatyrmaimyz. Máselen, Reseidegi Lomonosov atyndaǵy ýniversitette stýdentter filologiiany 42 mamandandyrylǵan baǵdar boiynsha bitirip shyǵady eken. Bizdiń filologiiada klassikalyq filolog shyǵady. Ol adam sol baiaǵy qyrqynshy jyldardan qalǵan baǵdarlamamen mektepte sabaq beredi. Odan qaldy aýdarmamen, ǵylymi jumyspen ainalysady», - dedi ol.
Eske sala ketsek, Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev «qazaq tili órkeniettiń oi-pikirin qalyptastyratyn tildermen qatar turýy kerektigin» aitqan bolatyn. Ulttyq qoǵamdyq senim keńesiniń 2-otyrysynda QR Prezidenti latyn álipbiine kóshý máselesinde asyǵystyq tanytýǵa bolmaitynyn eskertti.
«Qazaq tiline reforma, tipti qajet deseńizder tilimizdi jańǵyrtý qajet. Ǵalymdarymyzdyń salmaqty pikirlerin kútemiz. Taǵy da qaitalap aitamyn, biz naqty qazaq tilin reformalaimyz. Mundai ultymyz úshin taǵdyrsheshti máselede naýqanshyldyqqa jáne jeńiltektikke jol berýge bolmaidy», - dedi Qasym-Jomart Toqaev.
