"QR Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» AQ «Novyi mir» JShS-niń qatysýymen túsirilgen «Anaǵa aparar jol» filmi Bishkekte ótken «Aq ilbiris» atty VI ulttyq kinojúldesinde Ortalyq Aziianyń úzdik filmi atandy", - dep habarlaidy "Ult aqparat" "Qazaqfilm" AQ baspasóz qyzmetine silteme jasap.
Bas prodiýser Áliia Nazarbaeva men rejisser Aqan Sataevtyń birlesip shyǵarǵan «Anaǵa aparar jol» atty týyndysy úsh nominatsiia boiynsha baq synady. Olar: «Ortalyq Aziianyń úzdik filmi», «Ortalyq Aziianyń úzdik akteri» (akter Ádil Ahmetov úmitker), «Ortalyq Aziianyń úzdik aktrisasy» (aktrisa Altynai Nógerbek úmitker) nominatsiialary. Sondai-aq, osy júldelerge Ózbekstan men Tájikstannyń kartinalary da usynylǵan bolatyn.
Ulttyq júldeni rejisser Aqan Sataevqa qyrǵyzdyń kinorejisseri, Qyrǵyzstan Respýblikasynyń halyq artisi, atalmysh premiianyń quryltaishylarynyń biri Artyqbai Súiindikov jáne aziialyq kinofestivaldyń úilestirýshisi Los-Andjelestegi Ásel Sherniiazova tabystady.
- Túsirý tobyn osy jeńispen qýttyqtaimyn. «Anaǵa aparar jol» - Ortalyq Aziianyń úzdik filmi, - dep jazdy rejisser Aqan Sataev óziniń Instagram paraqshasynda.
Film ómirdiń aýyrtpalyǵyna tótep bergen, qiyn qystaý kúnderi surapyl soǵystyń mehnatyn kórgen basty keiipkerdiń taǵdyryn baiandaidy. Bul kinotýyndy ananyń perzentine degen sheksiz mahabbaty týraly, perzentiniń Otanyna degen adaldyǵy jaily. Atalǵan kinotýyndy 38-shi Halyqaralyq Máskeý kinofestivalinde jáne «Eýraziialyq kópir» atty festivalge qatysyp, Bas júldeni, sonymen qatar aktrisa Altynai Nógerbek «Úzdik áiel adam róli» nominatsiiasynda jeńiske jetti. Odan bólek, bul týyndy biyl Qazaqstan kinosynshylar assotsiatsiiasy uiymdastyrǵan «Synshylar tańdaýy» júldesinde úsh birdei júldeni iemdendi. Atap aitsaq, «Eń úzdik aktrisa» - Altynai Nógerbek jáne «Ekinshi plandaǵy úzdik aktrisa» Arýjan Jazylbekova dep tanyldy. Al «Filmge jazylǵan úzdik mýzyka» nominatsiiasyn atalmysh filmniń kompozitorlary Álim Zairov pen Roman Vishnevskii bólisti.
2012 jyly Qyrǵyzstannyń tanymal kinematografisteri uiymdastyrǵan «Aq Ilbiris» atty tuńǵysh ulttyq kinojúldesi - ótken jyldyń úzdik filmderin anyqtaityn eleýli is-shara. Kinojúlde Qyrǵyzstannyń kinematografister odaǵy, «Aitysh» qoǵamdyq uiymy jáne Qyrǵyzstan Respýblikasynyń kino damytý qory qoldaýymen marapattalady. «Ortalyq Aziianyń úzdik filmi» nominatsiiasy 2010 jyly alǵash tabystalǵan eken.
