QR Premer-Ministriniń orynbasary – Aýyl sharýashylyǵy ministri A.Myrzahmetov selektorlyq rejimde Shyǵys Qazaqstan oblysy aýyl sharýashylyǵy salasynyń jai-kúii men problemalyq máselelerin qarady, dep habarlaidy "Ult aqparat" AShM baspasóz qyzmetine silteme jasap.
Vedomstvanyń basshylyq quramymen birge osymen segizinshi óńirdiń agrarlyq damý áleýetterin tarazylaǵan ministr kópshilik suraýyna orai jaiylymdyq mal sharýashylyǵy mamandaryn yntalandyra túsý úshin jumys ótiline qarai biýdjet esebinen tólem qarastyrý men olarǵa turǵyn úi salý, sondai-aq, arnaiy jáne joǵary JOO-da balalaryna granttar bólý máselelerin sóz etti.
«Jaiylymdyq mal sharýashylyǵy, onyń ishinde, qoi sharýashylyǵy eldi mekenderden jyraqta, tiisti áleýmettik-turmystyq sharttarsyz, qiyn jaǵdaida júrgiziledi. Sondyqtan da, bul salany kadrmen qamtý jáne irikteý máselesi ótkir tur. Óz kezeginde, bizdiń Ministrlik ahýaldy ońǵaratyn barlyq bastamalardy qoldaidy jáne túitkildi Densaýlyq saqtaý jáne áleýmettik damý ministrligimen birlesip sheshetin bolady», – dep atap ótti A.Myrzahmetov.
Bul oraida, oblystaǵy aýyl sharýashylyǵy ónimderine qosylǵan qun salyǵy máselesi de qozǵaldy.
Aimaq ókilderiniń málimdeýinshe, qazirgi ýaqytta óndiris kólemin saqtaý men tamaq ónimderin satý úshin 50% sheginde QQS (12%) tómendetý nemese mólsherlemesin 6%-ǵa deiin jetkizý kerek.
Alaida, aýyl sharýashylyǵy ókilderi salyq salý máselesiniń Ulttyq ekonomika ministrliginiń Salyqtyq-keden kodeksi jumys tobynyń otyrysy aiasynda qaralatynyn atap ótti. Soǵan qaramastan, Ministrlik barsha quzyrly organdarǵa saýal joldap, suraý salatyn bolady.
Sonymen qatar, qatysýshylar biýdjet qarajatyn jalpy sipattaǵy transferttik baǵdarlamalar aiasynda qoldanýdy jetildirýdiń joldaryn talqyǵa salyp, birqatar ortaq sheshimderge keldi jáne jaýapty sala jetekshileri ShQO aýyl sharýashylyǵy qurylymdary túzgen máseleler tizbesi boiynsha ministrden tapsyrmalar aldy.
Aita keteiik, jiynǵa Aýyl sharýashylyǵynyń vitse-ministrleri men vedomstvalyq komitetter men departamentter basshylary, ShQO ákiminiń orynbasary men aýyl sharýashylyǵy qurylymdarynyń qyzmetkerleri jáne de «QazAgro» Ulttyq basqarýshy holdingi» AQ enshiles uiymdarynyń ókilderi qatysty.
