Halyqaralyq Amnesty International adam quqyǵyn qorǵaý uiymy qamaýda otyrǵan reseilik oppozitsiialyq saiasatker Aleksei Navalnyidy "ar-ujdan tutqyny" dep ataý týraly sheshimniń kúshin joidy.
"Mediazona" basylymyna bergen suhbatynda uiymnyń Shyǵys Eýropa jáne Ortalyq Aziia boiynsha menedjeri Aleksandr Artemev uiymnyń zań jáne saiasat departamenti Navalnyidyń 2000-jyldardyń ortasynda aitqan sózderin zerttep, onan "jek kórý ritorikasyn" tapqannan keiin osyndai sheshim qabyldanǵanyn aitty. Navalnyidyń naqty qandai sóz aitqanyn Artemev aitpady.
Onyń sózine qaraǵanda, uiymǵa Navalnyidyń sózderin tekserý týraly ótinishterdiń jappai túsýi shetelde oppozitsionerdiń bedelin túsirý kampaniiasynyń bir bóligi sekildi kóringen. Artemev kimderden ótinish túskenin naqtylamady. Degenmen "Navalnyidy dereý bosatý týraly talap kúshinde qalady, sebebi ol saiasi sebeppen qýdalanyp otyr" dedi.
Bir ai buryn Amnesty International Aleksei Navalnyidy "ar-ujdan tutqyny" dep tanyǵan.
Qańtar aiynyń ortasynda oppozitsioner Máskeýdiń Vnýkovo áýejaiynda ustalyp, qamalǵan. Amnesty sol kezde "Resei biligi Navalnyidyń únin taǵy óshirýge tyrysyp jatyr" dep málimdegen.
Keiinirek quqyq qorǵaý uiymyna bul sheshimge bailanysty jappai shaǵym túse bastaǵan. "Mediazona" basylymynyń qupiia derekkózi onyń ar jaǵynda Kreml qarjylandyratyn Russia Today mediaholdingi turǵan bolýy múmkin dep boljaǵan.
