Ózin "oppozitsiia kandidaty" dep ataityn, "Ult taǵdyry" qozǵalysy atynan sailaýǵa túsken Ámirjan Qosanov 10 maýsymǵa qaraǵan túni jariialanǵan eki ekzit-poll nátijesine bailanysty pikirin aitty. "Qoǵamdyq pikir" institýty men "Jastar" ǵylymi-zertteý ortalyǵy júrgizgen ekzit-poll nátijesi boiynsha "Nur-Otan" kandidaty Qasym-Jomart Toqaev shamamen 70 paiyz daýys alǵan. Al saiasatker Ámirjan Qosanov shamamen 15 paiyz daýys jinaǵan.
Ámirjan Qosanovtyń pikirinshe, "birikken oppozitsiianyń bolmaýy" jáne "shetelde júrgen demokratiialyq lager boiynsha buryn áriptes bolǵan" azamattardyń sailaýǵa "boikot jariialaýy" "jeńýine" kedergi jasaǵan.
Ol Qasym-Jomart Toqaevtyń qoǵammen dialog júrgizip, ózgeshe oilaityndardy qýdalamaý, ásirese jastardyń balama pikirine jol berý nietin "dáleldegenin" aityp, "jeńisimen" quttyqtady.
9 maýsymda sailaý bolǵan kúni Almaty men Nur-Sultanda, Shymkentte júzdegen adam narazylyqqa shyǵyp, sailaýǵa boikot jariialaityndyqtaryn aitty. Resmi derek boiynsha, Nur-Sultan men Almatyda keminde 500 adam ustalǵan.
0 maýsymǵa qaraǵan túni politsiia bólimshelerinde kóshpeli sot otyrystary boldy. Onyń aldynda sot ǵimarattary aldyna ustalǵandardyń týystary kelip, olardy bosatýdy talap etken.
Buǵan deiin eldiń ishki ister ministriniń orynbasary Marat Qojaev narazylyq aktsiiasyn "qoǵamdyq turaqtylyqty shaiqaý" talpynysy dep atap, oǵan qatysýshylardy "arandatýshylar" dedi. Ol sonymen birge politsiianyń "zań aiasynda" áreket etkenin aityp, mitingiler kezinde úsh politseidiń zardap shekkenin jetkizgen.
Bul - Qazaqstanda ótken altynshy prezident sailaýy. Ortalyq sailaý komissiiasy sailaýshylardyń 77,4 paiyzy daýys bergenin habarlady.
