2021 jyly 4 qarashada Qazaqstan Respýblikasynyń Aýyl sharýashylyǵy ministri Erbol Qarashókeev Amerika Qurama Shtattaryna resmi sapary aiasynda AQSh Aýyl sharýashylyǵy ministrliginiń halyqaralyq máseleler jónindegi aýyl sharýashylyǵy qyzmetiniń basshysy Deniel Ýitlimen kezdesti, dep habarlaidy "Ult aqparat" vedomstvonyń baspasóz qyzmetine silteme jasap.
Taraptar aýyl sharýashylyǵyndaǵy ekijaqty yntymaqtastyq, investitsiialar, klimattyń ózgerýi máselelerin talqylady.
«Qazaqstan men Amerika Qurama Shtattarynyń aýyl sharýashylyǵy salasyndaǵy yntymaqtastyǵy aitarlyqtai jaqsy qalyptasyp keledi. Biz aýyl sharýashylyǵy ónimderiniń saýdasy salasyndaǵy qarym-qatynastarymyzdyń keńeiip jatqanyna qýanyshtymyz jáne yntymaqtastyqtyń jańa múmkindikterin izdeýdi jalǵastyrýǵa niettimiz. Aita ketý kerek, AÓK ónimderiniń taýar ainalymy osy jyldyń 8 aiynda 77,5 mln dollardy qurady. AQSh-qa Eksport 86 ese artyp, 1,9 mln dollardy qurady, Qazaqstan óńdelgen aýyl sharýashylyǵy ónimderin jetkizý kólemin odan ári arttyrýǵa daiyn ekenin atap ótkim keledi. Qazaqstanǵa importtyń 12,4%-ǵa tómendegenin atap ótken jón, ol 75,5 mln dollardy qurady», - dedi Erbol Qarashókeev.
Vedomstvo basshysy Deniel Ýitlidi Qazaqstannyń agrarlyq sektoryn damytýdyń basym baǵyttary týraly habardar etip, nátijesinde aýyl sharýashylyǵynyń jalpy ónimi kóleminiń 1,3 esege ulǵaiýy jáne 2025 jylǵa qarai áleýmettik mańyzy bar negizgi azyq-túlik taýarlaryna jergilikti qajettilikterdi 100% qamtamasyz etý kútilip otyrǵanyn aitty.
«Amerikandyq ozyq tehnologiialar men bai tájiribelerdi engizý ózara tiimdi protsess bolar edi. Osylaisha, biz birlesken ǵylymi zertteýler júrgizýdi, kadrlar daiarlaý jáne ekstenshn boiynsha amerikandyq tehnologiialar men bilim berý baǵdarlamalarynyń transfertin usynamyz», - dedi Erbol Qarashókeev.
Klimattyń ózgerýi máselelerin talqylaý kezinde ministr aldaǵy 35 jylda álemdik aýyl sharýashylyq salasy ártúrli qysym túrlerimen tap keletinin, sonyń ishinde álem halqynyń ósýi, jer, sý jáne energetikalyq resýrstar úshin básekelestiktiń kúsheiýi jáne klimattyń ózgerýiniń ekzistentsialdy qateriniń teńdessiz úilesimine tap bolatynyn atap ótti.
«Sondyqtan damyǵan elderdiń agrarlyq saiasaty azyq-túlik sektoryn turaqty damytý tujyrymdamasyna negizdeledi. Turaqtylyq úsh komponenttiń teńgerimdi damýyna negizdelgen - turaqty óndiris, turaqty ekologiia jáne turaqty áleýmettik komponent. Olardyń birin elemeý júieniń tepe-teńdigin buzady», - dedi Erbol Qarashókeev.
Sondai-aq, vedomstvo basshysy QR Úkimeti 2030 jylǵa deiingi AÓK damytý tujyrymdamasy jáne 2025 jylǵa deiingi AÓK damytýdyń Ulttyq jobasy aiasynda aýyl sharýashylyǵyndaǵy tómen kómirtekti damytý úshin negiz qalaǵanyn aityp, ministrliktiń tabysty ádistemeler men AQSh tájiribesin paidalanýdy qarastyrýǵa daiyn ekenin atap ótti.
Kezdesý qorytyndysy boiynsha taraptar kelissózder nátijelerine qanaǵattanǵandyqtaryn bildirip, barlyq aspektiler boiynsha yntymaqtastyqty jalǵastyrý týraly ýaǵdalasty, kezdesý syndarly jáne áriptestik dialog jaǵdaiynda ótkenin atap ótti. Taraptar bul sapar Qazaqstan-Amerika yntymaqtastyǵyna qosymsha serpin beretinine jáne aýyl sharýashylyǵy salasyndaǵy ózara is-qimyldy tiimdi damytýǵa yqpal etetinine senim bildirdi.
Sapar barysynda Aýyl sharýashylyǵy ministri Erbol Qarashókeev Dúniejúzilik Banktiń basshylyǵymen, turaqty damý jónindegi vitse-prezidenti Iýrgen Fegelemen, ornyqty damý jónindegi óńirlik direktory Stiven Shonbergermen, sondai-aq aýyl sharýashylyǵy jáne azyq-túlik salasyndaǵy jahandyq praktika jónindegi direktory Martien van Niýkýoppen kezdesti.
Taraptar nátijege baǵdarlanǵan mal sharýashylyǵyn turaqty damytý jónindegi jobany iske asyrý boiynsha aldaǵy qadamdardy talqylady. QR Úkimeti joba sheńberinde 2021 jyldyń sońyna deiin Qaryz týraly kelisimdi ratifikatsiialaý boiynsha barlyq rásimderdi aiaqtaýdy josparlap otyr.
«Biz iskerlik yntymaqtastyqty aitarlyqtai keńeitýge múddelimiz jáne salany damytý salasyndaǵy ózara is-qimyl boiynsha jańa usynystardy talqylaýǵa daiynbyz. Dúniejúzilik bank sarapshylary bolashaqta planetany tamaqtandyratyn el retinde Qazaqstannyń aýyl sharýashylyǵyn damytýdaǵy áleýetin joǵary baǵalaǵanyn atap ótkim keledi. Biz bárimiz birlesken jáne jemisti jumysqa umtylamyz dep oilaimyn», - dedi Erbol Qarashókeev.
Kezdesýdi qorytyndylai kele, vedomstvo basshysy Dúniejúzilik bankpen tyǵyz seriktestik Qazaqstan ekonomikasynyń aýyl sharýashylyǵy sektorynda jaqsy nátijege qol jetkizýge septigin tigizetinine senim bildirdi.
