Amerikalyqtar asyrap alǵan Tailer (Talǵat) Blotter Facebook jelisi arqyly Qazaqstandaǵy týystaryn tapty, dep habarlaidy QazAqparat.
«Jaqsy jańalyq - bala kezinde Qazaqstannan asyrap alynǵan Tailer Blotter (Talǵat) týǵan baýyrlarymen qaýyshty. Oǵan Erqanat Tasybaev kómektesip, birneshe saǵatta Pavlodardaǵy otbasyn taýyp berdi. Jaraisyń, Erqanat!», - dep habarlandy Facebook jelisindegi qazaqstandyq-amerikalyq qaýymdastyq paraqshasynda.
Tailer (Talǵat) Blotterdi kishkentai kezinde amerikalyqtar Qazaqstandaǵy balalar úiinen asyrap alǵan jáne Michigan shtatyna alyp ketken. Tailer jańa otbasynan kóp nárseni úirengenin, biraq óz kelbetiniń otbasyna uqsamaitynyn, sol úshin qatarlastarynyń mazaǵyna ushyraǵanyn jazdy.
«Ózimniń kim ekenimdi, qandai otbasydan shyqqanymdy bilmegenim úshin, ainalamdarǵy adamdardan erekshe bolǵanym úshin jylaityn edim. Ózimdi ózim baǵalamadym. Qazir mundai oilarmen kúresip kelemin. Mektepte oqyp júrgende óz otbasym, baýyrlarym týraly kóp oilaitynmyn. «Qandai eken?» dep oisha elestetetinmin», - dep jazdy Tailer (Talǵat) Blotter óziniń Facebook paraqshasynda.
Orta mektepti bitirgen soń Tailer (Talǵat) Las-Vegas qalasyna kóship, sonda bilim alǵan jáne jumys istegen.
2020 jyly karantin bastalǵanda óz otbasyn izdep tabýdy maqsat etip qoiǵan.
«Týǵan anamnyń tegine uqsas barlyq adamdarǵa habarlama jiberdim. «Siz meni tanymaisyz. Biraq, myna áieldi bilesiz be?» degen syńaida hat jazdym. Maǵan eshkim jaýap bermedi. Tek bir adam qol ushyn sozyp, meni jelidegi qazaqstandyq-amerikalyq qaýymdastyq paraqshasyna qosty, osy paraqshaǵa óz oqiǵańdy jaz dedi. 2020 jyldyń 24 shildesinde túski 1-de óz oqiǵamdy baiandap, post shyǵarǵan edim. Sanaýly saǵatta-aq telefonyma habarlama tolyp qaldy. Kóptegen qazaqtar maǵan kómekteskisi keldi. Sol kúni keshki 5-te bir adam Qazaqstanda memlekettik qyzmette isteitin dostary bar ekenin, solar arqyly izdep kóretinin jazdy. Al keshki 8-de «Seniń otbasyń tabyldy» dep habarlasty. Men, árine, sengen joqpyn. Tipti ne oilarymdy bilmedim», - deidi keiipker.
Osylaisha Tailer Qazaqstandaǵy ápkesimen jáne baýyrlarymen beinebailanys arqyly sóilesken.
«Olar meni 16 jyl boiy izdepti. Balalar úii men týraly esh aqparat bermegen. Olardyń esh habary bolmaǵan. 16 jyl ótken soń biologiialyq otbasymmen bailanysyp otyrmyn. Bul jazbany da maqtanǵannan emes, qatty tolqyǵannan jazyp otyrmyn», - deidi Tailer (Talǵat) Blotter.
