Qazaqstan Respýblikasynyń Premer-Ministri Asqar Mamin beinekonferentsiia bailanysy rejiminde «Valmont Industries» kompaniiasynyń prezidenti Stiven Kanevskimen kelissóz júrgizdi, dep jazady primeminister.kz.
Taraptar mal sharýashylyǵy, selektsiia, tuqym sharýashylyǵy, tamshylatyp jáne jańbyrlatyp sýarý, agrarlyq ǵylym jáne bilim salalaryndaǵy yntymaqtastyq pen tájiribe almasý keleshegin talqylady. Kelissóz qorytyndysy boiynsha QR Aýyl sharýashylyǵy ministrligi, qazaqstandyq «Kusto Group» kompaniiasy jáne amerikalyq «Valmont Industries» kompaniiasy arasynda investitsiialar týraly kelisimge qol qoiyldy.
Qujat Qazaqstanda demonstratsiialyq fermalar jelisin qurýdy jáne zamanaýi sýarý júielerin óndiretin jáne aýyl sharýashylyǵy daqyldarynyń ónimdiligin basqaratyn zaýyt salýdy kózdeidi.
Kásiporynnyń qýattylyǵy jylyna 1 myń «Valley» frontaldy jáne ainalmaly sýarý mashinalaryn quraidy. Amerikalyq irrigatsiia tehnologiialary ósimdik sharýashylyǵynyń ónimdiligin arttyrýǵa jáne aýyl sharýashylyǵyndaǵy sý shyǵynyn 50-70%-ǵa azaitýǵa múmkindik beredi. Demonstratsiialyq fermalar jelisin qalyptastyrý sýarý, sý resýrstaryn utymdy paidalaný, jemshóp óndirý, fermerlerdi oqytý men trening ótkizý jáne bilikti kadrlar daiarlaý salasyndaǵy ozyq tehnologiialar transferin qamtamasyz etedi.
«Valmont Industries» kompaniiasy – sý infraqurylymy nysandaryn basqarý jáne investitsiiasy, sýarmaly eginshilik jáne irrigatsiialyq júieler óndirisi salasyndaǵy álemdik kóshbasshy. Shtab-páteri AQSh-tyń Nebraska shtatyndaǵy Omaha qalasynda 1946 jyly qurylǵan. Kompaniianyń jyldyq ainalymy $2,6 mlrd asady. Úkimet basshysy QR ekonomikasynyń qarqyndy damyp kele jatqan sektorlarynyń biri AÓK ekenin atap ótti. Bul rette, BUU janyndaǵy Azyq-túlik jáne aýyl sharýashylyǵy uiymynyń (FAO) baǵalaýy boiynsha Qazaqstan aýyl sharýashylyǵy salasyndaǵy áleýeti barynsha joǵary elderdiń bestigine kiredi. «2020 jyldyń qorytyndysy boiynsha aýyl sharýashylyǵynda 5,6%-ǵa turaqty ósim qamtamasyz etildi – bul saladaǵy sońǵy 6 jyldaǵy eń joǵary kórsetkish. AÓK jahandyq azyq-túlik tizbeginde jalǵasyn tapqan irkilis jaǵdaiynda Qazaqstanda infliatsiiany tejeýdiń negizgi faktoryna ainaldy», — dedi A. Mamin.
Kelissózge Qazaqstan tarapynan Premer-Ministrdiń birinshi orynbasary Álihan Smaiylov, aýyl sharýashylyǵy ministri Saparhan Omarov, ulttyq ekonomika ministri Rýslan Dálenov, syrtqy ister ministri Muhtar Tileýberdi, AQSh-taǵy QR elshisi Erjan Qazyhanov, «Kusto Group» basshysy Erkin Tátishev, amerikalyq taraptan AQSh-tyń Qazaqstandaǵy elshisiniń orynbasary Ling Teodor, «Valmont Irrigation» prezidenti Lenni Adams jáne «Valmont Industries» vitse-prezidenti Djoshýa Dikson qatysty.
