Amerikalyq stýdentter 280 dollarǵa satyp alatyn oqýlyqty qazaqstandar tegin oqidy. Bul týraly búgin «Jańa gýmanitarlyq bilim. Qazaq tilindegi 100 jańa oqýlyq» jobasy aiasynda jaryq kórgen oqýlyqtardy Elbasy Nursultan Nazarbaevqa tanystyrý barysynda Ulttyq aýdarma biýrosynyń atqarýshy direktory Raýan Kenjehanuly aitty, dep habarlaidy QazAqparat.
«Bul deńgeidegi bir oqýlyqty qurastyryp, basýǵa daiyndaý quny 500 myńnan 3 million dollarǵa deiin jetedi. Sondyqtan da oqýlyqtardyń baǵasy ádette óte joǵary. Mysaly, biz aýdarǵan professor Menkiýdiń «Ekonomiks» atty oqýlyǵyn amerikalyq stýdentter 280 dollarǵa satyp alady. Onyń ústine oqýlyqty ózge tilge aýdaryp, basýǵa da avtorlar qatań baqylaý jasaidy», - dep atap ótti ol.
Onyń aitýynsha, atalǵan jaitty eskere otyryp aýdarma jumysyna elimizdegi irgeli oqý oryndary, gýmanitarlyq baǵyttaǵy ǵylymi-zertteý ortalyqtarynyń mamandaryn keńinen tartýǵa kúsh salynǵan. Aýdarmany meilinshe sapaly shyǵarý úshin jumysqa tájiribeli aýdarmashylar men joǵary oqý oryndarynyń ustazdary shaqyrylyp, ǵylymi redaktsiia jasaýǵa elimizdiń belgili ǵalymdary, ádebi redaktsiiaǵa qarymdy qalamgerler, bilikti redaktorlar men baspagerler tartylǵan.
«Qazir bul jumysqa 200-ge tarta maman qatysýda. Sondai-aq, ǵylymi aýdarmasy jolǵa qoiylǵan elderdiń tájiribesi muqiiat zertteldi. Irgeli aýdarma tehnologiiasynyń biri dúniejúziniń 181 myńnan asa aýdarmashysy qoldanatyn arnaiy tuǵyrnama usyldy», - dedi Raýan Kenjehanuly.
Aita keteiik, Astanadaǵy Nazarbaev ortalyǵynda «Qazaq tilindegi 100 jańa oqýlyq»jobasy aiasynda aýdarylǵan alǵashqy kitaptardyń tanystyrylymy ótip jatyr. Saltanatty sharaǵa QR Prezidenti Nursultan Nazarbaev qatysýda.
Jiynda sóz sóilegen Ulttyq aýdarma biýrosynyń atqarýshy direktory Raýan Kenjehanuly qazaq tiline aýdarylǵan 18 oqýlyqtyń jalpy taralymy 47 millionnan asatyndyǵyn aitty.
