Aqyn, qazaq ábietiniń kórnekti ókili, jýrnalist Amanhan Álimuly 68 jasynda dúnieden ozdy.
Amanhan Álimuly 1952 jyly Túrkistan oblysy, Otyrar aýdany, Qojatoǵai aýylynda dúniege kelgen.
1975 jyly ál-Farabi atyndaǵy QazUÝ-niń jýrnalistika fakýltetine oqýǵa túsip, 1981 jyly bitiredi. Oqýdy bitirgen soń, 1981-1989 jyldar aralyǵynda respýblikalyq «Qazaqstan pioneri» («Ulan»), «Leninshil jas» («Jas alash»), «Qazaq ádebieti», «Túrkistan» gazetterinde jáne «Qazaq radiosynda» qyzmet etedi. 1991-1993 jyldar aralyǵynda M.Gorkii atyndaǵy búkilodaqtyq Ádebiet institýtynyń joǵarǵy kýrsynyń kúndizgi bóliminde oqidy. 1994-2012 jyldar aralyǵynda «Zań gazetinde» jaýapty hatshy jáne sholýshy bolyp jumys jasaǵan.
2012-2020 jyldar aralyǵynda "Aqiqat" jýrnalynyń bas redaktory qyzmetin atqarǵan. 2020 jyldyń qańtarynan "Aqiqat" jýrnalynyń sholýshysy.
Ol qazaq ádebi syn janrynyń damýyna zor úles qosty. Qazaq poeziiasynda ózindik qoltańbasymen erekshelendi, jýrnalistikada ádebi, tanymdyq jáne saiasi-áleýmettik máseleler boiynsha zertteýlerimen tanyldy. Muqaǵali Maqataev atyndaǵy ádebiet syilyǵymen, 2019 jyly "Qurmet" ordenimen marapattalǵan.
Jýyrda ǵana Jýrnalister Akademiiasynyń tolyq múshesi-akademigi diplomy jáne tósbelgisin alǵan.
«Kezdesý», «Janymnyń japyraǵy» (1989), «Ai nury alaqanymda» (1996) jyr jinaqtarynyń avtory. Sońǵy jyldary "Mahabbatym meniń", "Janymnyń japyraǵy", "Bes qońyraý", "Kezdesý", "Ótkirdiń júzi" atty pýblitsistikalyq jáne óleńder jinaǵy jaryq kórgen.
Osy oraida, Ult portalynyń ujymy elge qadirli bolǵan asyl aǵamyzdyń mezgilsiz dúnieden ozýyna bailanysty otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
