Qazaq halqy – myqty halyq. Biz osyndai náýbetten, qiyndyqtan, qasiretten aman qaldyq, kúsh jinadyq. Bul týraly filosifiia ǵylymdarynyń doktory Amangeldi Aitaly aitty, dep habarlaidy QazAqparat.
Búgin Aqtóbedegi Túietóbede qýǵyn-súrgin jáne asharshylyq qunbandaryna qoiylǵan eskertkishke gúl qoiý rásimi ótti. Ata-baba rýhyna quran baǵyshtaldy. Filosifiia ǵylymdarynyń doktory, professor Amangeldi Aitaly bul kúnniń mán-mańyzyna toqtaldy.
«Myń ólip, myń tirilgen qazaq» dep aitady. Bul halyqtyń júregine jara salǵan, halyqty úlken indetke, apatqa ushyratqan qýǵyn-súrgin saiasaty. Bul saiasat jan-jaqty boldy. Bul saiasi repressiia boldy. Bul ekonomikalyq repressiia boldy. Halyqtyń malyn, nanyn tartyp aldy. Bul ideologiialyq jáne rýhani repressiia boldy. Tvorchestvolyq adamdardyń shyǵarmalaryn órtep, jaýyp, olardy da tutqyndady. Ózderin de, eńbekterin de. Meshitter qiratyldy. Moldalar, imamdar, dini ǵalymdar qýdalandy. Ainalyp kelgende bul repressiia bizdiń halqymyzdyń tamyryna jan-jaqty balta shabýǵa arnalǵan dúnie boldy. Ol kúnde qansha shyǵyn boldy, qansha adam dúnieden ketti. Barlyǵyn halyq bilip jatyr. Eske alýdyń máni tek jylap-syqtaýda emes, eń bastysy adamdy, adamnyń oiyn, pikirin syilaý. Óz ultyna degen sezimin, mahabbatyn dáripteý. Negizi úlken gýmanistik, adamgershilik saiasat osy. Men aitar edim, qazaq halqy – myqty halyq. Biz osyndai náýbetten, qiyndyqtan, qasiretten aman qaldyq. Kúsh jinadyq. Úlken memlekettiń iesi boldyq. Bir jaǵynan táýelsizdigimizge shúkirshiligimizdi bildiremiz», - dedi Amangeldi Aitaly.
