Almaty oblysynyń ákimi Amandyq Batalov «demagog» dep atap, jumystan qýǵan sheneýnik óz qyzmetinde qalatyn boldy, - dep habarlaidy "Ult aqparat".
«Ol aryz jazbady. Esep berý kezdesýinen keiin kópbalaly analar bizge habarlasyp, ótinish aitty. «Bir turǵynnyń aryzy - búkil halyqtyń pikiri emes» dedi. Analar áleýmettik jelilerge jáne oblys ákimine jeke-jeke hat jazyp, qala orynbasaryn ornynda qaldyrýdy surady. Turǵyndardyń pikirinshe, Qaliasqarov kópbalaly analarmen jaqsy jumys isteidi. Osyǵan bailanysty ony jumys ornynda qaldyrý týraly sheshim qabyldandy, biraq budan bylai eshkim onyń jumysyna shaǵymdanbaýy úshin oǵan eskertý jasaldy», - dedi Almaty oblysy ákiminiń baspasóz hatshysy Ǵalymurat Júkel.
Esterińizge sala keteiik, keshe oblys ákiminiń esebi aiaqtalǵannan keiin taldyqorǵandyq turǵyn Liazzat Qudaibergen Amandyq Batalovqa shaǵymyn jetkizgen bolatyn. Amandyq Batalovtyń Taldyqorǵan qalasy ákiminiń orynbasary Ashat Qaliasqarovty ne sebepti «demagog» dep ataǵanyn siltemeni basyp, oqi alasyzdar.
