Almaty oblysyndaǵy ár aýdan, qaladaǵy jastar resýrstyq ortalyqtaryna 10 gektardan jer bólinedi. Olar ol jerde aýylsharýashylyq daqyldaryn ósirip, odan túsken qarjyny eldimekenderdi kórkeitýge jumsamaq, dep habarlaidy "Ult aqparat".
Taldyqorǵanda Almaty oblysy ákiminiń qatysýymen Jastar jylynyń saltanatty ashylý jiyny ótti. Basqosýǵa ár salada eńbek etip júrgen óńir jastary, halyqaralyq jarystarda top jaryp júrgen sportshylar, eriktiler men oblystyq departament basshylary qatysty.
Jinalǵandardy Jastar jylynyń bastalýymen quttyqtaǵan óńir basshysy Amandyq Batalov 2019 jyldyń «Jastar jyly» dep atalýynyń tarihi máni zor ekendigin atap ótti.
Búgingi tańda Almaty oblysynda Jetisý jastarynyń jarqyn isteri atty jumys jospary qurastyrylǵan. Ol jerde Jastar jyly aiasynda atqarylatyn is-sharalar bekitilip, naqty qadamdar belgilengen. Máselen Almaty oblysynyń barlyq aýdan, qalalarynda Jastarǵa qyzmet kórsetý ortalyqtaryn salý máselesi qarastyrylýda. Óńirde aýylsharýashylyǵyn damytyp, aýyl jastaryn jumyspen qamtý maqsatynda ár resýrstyq ortalyqqa 10 gektardan jer bólinbek. Bul jerlerde jastar ártúrli daqyldar egip, ósirip, shyqqan ónimdi ótkizip, odan túsken qarajatty aýyldy kórkeitýge baǵyttaityn bolady.
Almaty oblystyq jastar resýrstyq ortalyǵynyń jetekshisi Jandos Baihamitovtiń aitýynsha daqyl tańdaýda ár aýdannyń klimattyq jaǵdaiyna basymdyq beriledi.
«Máselen Sarqan aýdanynda qant qyzylshasy, Raiymbek aýdanynda kartop ósiriledi. Kúzgi jiyn terinnen túsken qarajatqa street workout alańdary salynyp, koýorking ortalyqtaryna qajet jabdyqtar alynady», - deidi ortalyq jetekshisi.
Sondai-aq Elbasy tapsyrmasyn júzege asyrý maqsatynda volonterlyq qozǵalysty damytyp, belsendi jumys istegen erikti stýdentterge shákirtaqy 30 paiyzǵa artady. Prezidenttiń 5 áleýmettik bastamasy sheńberinde 2018-2019 jyldary jergilikti biýdjetten 106 grant bólinip otyr. 2020 jylǵa deiin 2 000 stýdentke jataqhana salynady.
