Almaty oblysynyń ákimi Amandyq Batalov «Damý» Kásipkerlikti damytý qory» AQ basqarmasynyń tóraiymy Gaýhar Bóribaevamen kezdesti, dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Kezdesýde óńirdegi shaǵyn jáne orta biznesti qoldaýǵa baǵyttalǵan memlekettik baǵdarlamalardyń oryndalý barysy talqylanyp, qordyń óńirlik filialynyń jańa basshysy tanystyryldy.
Amandyq Batalov qabyldanǵan sharalardyń nátijesinde ótken jyldyń qorytyndysy boiynsha jalpy óńirlik ónimniń kólemi 3 trln. teńgege jetkenin aitty, mundaǵy ShOB-nyń úlesi - 32%.
- «Damý» qory shaǵyn jáne orta biznesti damytý salasynda oblysqa zor qoldaý tanytyp otyr. Biz óz tarapymyzdan barlyq qajetti kómekti kórsetemiz. Biylǵy jyly shaǵyn jáne orta biznesti damytýǵa baǵyttalǵan «Jetisý» óńirlik baǵdarlamasyn birlesip júzege asyrýǵa qajetti 500 mln. teńge biýdjetten bólinetin bolady, - dedi A.Batalov.
Óz kezeginde Gaýhar Bóribaeva qordyń óńirlik filialynyń jańa direktory Timýr Ikeevti tanystyryp, qordyń óńirde atqarǵan jumysy týraly aityp berdi, sol siiaqty osy saladaǵy qol jetken jetistikterine de toqtaldy. Máselen, ShOB damytýǵa beriletin shaǵyn nesieler boiynsha qaryz alýshylar sany jaǵynan Almaty oblysy respýblikada birinshi orynda, iaǵni 13,5%. Oblysta Nátijeli jumyspen qamtýdyń jáne jappai kásipkerlikti damytýdyń «Eńbek» baǵdarlamasy sheńberinde 54 joba boiynsha 633,7 mln. teńge somasyndaǵy nesiege, «Damý-Optika» baǵdarlamasynda 32 joba boiynsha 1 mlrd. teńgeden astam somadaǵy nesiege kepildik berilgen. Oǵan qosa «Qarapaiym zattar ekonomikasy» baǵdarlamasy sheńberinde sýbsidiialaý baǵyty boiynsha somasy 3,7 mlrd. teńge nesiege 14 jobaǵa qol qoiyldy, sol siiaqty kepildik etý jelisi boiynsha somasy 181,3 mln. teńge bolatyn nesiege 3 jobaǵa kepildik berildi.
Sol siiaqty G.Bóribaeva qor keńseleri Qarasai aýdanynyń Qaskeleń qalasynda jáne Talǵar aýdanynyń Talǵar qalasynda ashylatynyn aitty.
Kezdesý sońynda Amandyq Batalov halyqty jumyspen qamtý mańyzdy mindetterdiń biri ekenin, bul máseleni sheshýdi «Damý» kásipkerlikti damytý qory» AQ-men birlesip jumys atqarýdyń mańyzy zor ekenine atap ótti.
Jalpy ótken jyldyń qorytyndysy boiynsha Almaty oblysynda ShOB sýbektileriniń sany 122 myńnan asty, olardan túsken salyq 1,3 esege ósip, 113 mlrd. teńgeni qurady. Oblys kásipkerlerine 11,8 mlrd. teńge kóleminde memlekettik qoldaý kórsetilgen. Jalpy óńirlik ónimdegi ShOB úlesi 32%-ke jetti.
