Almaty oblysy ákimi Amandyq Batalov jańa jyldyń alǵashqy kúnderinde Jastar jylyna bailanysty jastarmen erkin formatta kezdesý ótkizgen edi. Sonyń qorytyndysynda oblystyń árbir aýdan, qalasynda jastarǵa qyzmet kórsetý ortalyqtary salynyp, aýyl sharýashylyǵymen ainalysýlary úshin jastar resrýstary ortalyqtaryna 10 gektardan jer beriletin bolyp sheshilgen bolatyn. Sol siiaqty jas otbasylar arasynda ajyrasýdy azaitý maqsatynda psiholog shtattaryn bólý de tapsyrylǵan-dy. Oblys ákimi Amandyq Batalovtyń búgin jastarmen qaitalai kezdesýinde Jastar jylynyń resmi ashylýynda Memleket basshysy bergen tapsyrmalardyń jergilikti jerlerde oryndalýy týraly másele taqylandy.
Kezdesýdi moderator retinde I. Jansúgirov atyndaǵy Jetisý memlekettik ýniversitetiniń ǵylymi zertteýler qorytyndylaryn kommertsiialandyrý keńsesiniń direktory Damir Ogai júrgizdi.
Jastar atynan stýdentter, sportshylar, qoǵam belsendileri, ár salada eńbek etip júrgen jas mamandar sóz alyp, jetisýlyq jastar barlyq mańyzdy jobalarda bastamashyldyq, kreativtilik tanyta alatyndaryn aitty. Máselen, jas maman Darhan Nurmadiev óz sózinde Semeide týyp-ósip, Astanadaǵy meditsina ýniversitetin bitirgenin jáne «Diplommen aýylǵa» jobasynyń qatysýshysy retinde Jetisý jerine taban tiregenin atap ótti.
- Qazirgi kezde Eskeldi aýdandyq aýrýhanasynda terapevt dáriger bolyp jumys isteimin. Men durys tańdaý jasadym, meniń bilimim men mashyǵym halyqtyń densaýlyǵyn jaqsartýǵa yqpal etip jatqanyna rizamyn. «Diplommen aýylǵa» jobasy boiynsha aýrýhanada jumys istep júrgen men siiaqty taǵy 8 maman bar. Bárimiz de bir rettik kóterme járdemaqy men turǵyn úi nesiesine kezekte turmyz, aqpan aiynda alamyz dep josparlap otyrmyz. Biz elge paidamyzdy tigizgenimizge, al memleket bizge qoldaý kórsetkenine rizamyz, - dedi ol.
Qaratal aýdanyndaǵy «Baqyt-Qaratal» JShS direktory Serikjan Jeksembinov óziniń aýyl sharýashylyǵy salasyndaǵy jetistikterimen bólisti. Ol da memleket tarapynan kórsetilgen qoldaý onyń jemisti jumysyna zor yqpal etkenin atap ótti. Tabysty kásipkerlikpen qatar Serikjan - «Týǵan jer» baǵdarlamasynyń belsendi qatysýshylarynyń biri. Onyń Qaratal aýdanyn kórkeitýge baǵyttalǵan igi áreketteri aitýǵa turarlyq. Ótken jyldyń qorytyndysy boiynsha ol «Jyl metsenaty» nominatsiiasynda jeńimpaz atanǵan.
Jazel Dakýbaeva – Taldyqorǵannyń «Jetisý eriktileri» eriktiler qozǵalysynyń belsendi qatysýshysy. Ol óz sózinde barsha jastardy eriktiler qozǵalysyna atsalysýǵa shaqyryp, oblys ákimine oqýda ozat eriktilerdiń joǵary oqý oryndaryna grant bólý máselesin qarastyrýdy surady.
Taldyqorǵan qalasyndaǵy Nazarbaev ziiatkerlik mektebi direktorynyń oqý isi jónindegi orynbasary Viktor Sosin óńirde IT-tehnologiiany damytýǵa barlyq jaǵdai bar ekenin, oblys basshysynyń jastar úshin IT-startap jobalarynyń tehnoparkin qurý týraly ideiasyn qoldaitynyn jetkizdi.
Jastardy sportpen shuǵyldanýǵa, salamatty ómir saltyn ustanýǵa shaqyrǵan QR bokstan sport sheberi, Álem chempionatynyń kúmis júldegeri Anel Qudaibergen oblys basshylyǵynan sporttaǵy daryndy jastardy qoldaýdy surady.
Kezdesý sońynda sóz alǵan oblys ákimi Amandyq Batalov kúni keshe ǵana Astanada Jastar jylyna arnalǵan aýqymdy forým ótkenin, bul jiynda Memleket basshysy jyl kóleminde atqarylýy tiis birqatar mindetterdi aiqyndaǵanyn atap ótti.
- Bul oraida búgingi kúni oblysta Jastar jylyna arnalǵan «Jetisý jastarynyń jarqyn isteri» jumys jospary daiyndalyp, bekitildi. Alǵashqy kezdesýde sizdermen talqylaǵan usynystardyń júzege asyrylýy jiti baqylaýǵa alynǵan, ol baǵytta naqty jumystar júrgizile bastady. Atap aitqanda, oblystyń árbir aýdan, qalasynda jastarǵa qyzmet kórsetý ortalyqtary salynady, Taldyqorǵandaǵy JQO bazasynda IT-startap tehnorparki qurylady. Aýyl sharýashylyǵymen ainalysýlary úshin jastar resrýstary ortalyqtaryna 10 gektardan jer beriletin bolyp sheshilgen bolatyn. Sol siiaqty jas otbasylar arasynda ajyrasýdy azaitý maqsatynda psiholog shtattaryn bólý de qarastyrylady. Oǵan qosa búgingi kezdesýde de birqatar usynystar aityldy. Men onyń bárin qaǵazǵa túrtip, oiyma túiip qoidym. Qai kezde de jastardan jaqsy ideia týyndap, izgi bastamalar jasalsa, biz qoldaýǵa árqashan daiynbyz, - dedi A. Batalov.
