Búgin alǵash ret «Rýhtastar» jastar syilyǵynyń iegerlerin marapattaý rásimi ótti. «AMANAT» partiiasynyń «Jastar Rýhy» jastar qanatynyń úzdik volonterleri men belsendileri qoǵamdyq qyzmeti, elimizdegi jastar saiasatynyń damýyna qosqan úlesi úshin músinshe men sertifikatqa ie boldy.
«AMANAT» partiiasy jastar qanatynyń kezekten tys VI Sezinde Qazaqstan Prezidenti Qasym-Jomart Toqaev jastar úshin úsh mańyzdy basymdyqty atap ótken bolatyn. Olar – tereń bilim, eńbekqorlyq jáne otanshyldyq qasiet. Sol kezde jastar qanatyn transformatsiialaý baǵdarlamasy qabyldandy.
Is-sharany ashqan «AMANAT» partiiasynyń Atqarýshy hatshysy Ashat Oralov jastar damýdyń negizgi qozǵaýshy kúshi sanalatynyn atap ótti.
«Ádiletti Qazaqstan bilimdi jáne eńbekqor jastardyń kúshimen qurylady. Eldegi barlyq bastamalar men reformalar jastarmen birge iske asyrylyp keledi. Jas qazaqstandyqtar óz qarym-qabiletin tanytý úshin barlyq múmkindikke ie bolýy tiis. Sondyqtan, biyl alǵash ret ótkizilip otyrǵan «Rýhtastar» syilyǵy jas azamattardy belsendi qoǵamdyq qyzmetke yntalandyrýǵa jáne jastardy ortaq, jasampaz qundylyqtar tóńireginde toptastyrýǵa baǵyttalǵan», – dedi Ashat Oralov.
Osylaisha, «Qaisar» jyl batyry nominatsiiasyn boiynsha Jańaózen qalasynyń politsiia aǵa leitenanty Álibek Basbaev jeńiske jetti. Ol óz ómirine qater tónip turǵanyna qaramastan, úshinshi qabattaǵy páterdiń terezesine kóterilip, qulap ketýge shaq qalǵan aýtist balany qutqaryp qaldy.
«Politsiia bólimine habarlama kelip tústi. Onda tereze aldynda erekshe bala turǵany jáne esikti óz betinshe asha almaityny aityldy. Biz birden oqiǵa ornyna keldik. Men ekinshi qabattaǵy kórshi páter arqyly úshinshi qabatqa kóterildim. Sóitip, balany aman-esen anasyna tabys ettik. Bul bizdiń kúndelikti jumysymyz. Marapat týraly oilaǵan da emespin», – dedi Álibek Basbaev.
«Nurly aqyl» jyl stýdenti nominatsiiasy boiynsha joǵary úlgerimi men belsendi qoǵamdyq qyzmeti úshin Semei qalasynyń stýdenti Medina Beiimbetova marapatqa ie boldy. Ol búginde Jetisý ýniversitetindegi «Start up akademiianyń» rezidenti. Sondai-aq, robototehnika mektebinde jumys isteidi. Buǵan qosa, oqýshylardy túrli olimpiadalar men jarystarǵa daiyndaidy.
Óskemen qalasynan kelgen Syrym Ómirzaqov «Ystyq qairat» eńbek adamy nominatsiiasynda jeńiske jetti. Syrym qalalyq JEO-da jetekshi injener bolyp jumys isteidi. Sondai-aq, ol jumys istep qana qoimai, jastar arasyndaǵy qyzmetin de utymdy úilestirip júr.
«Jyldyń ekobelsendisi» nominatsiiasynda Qostanai oblysynyń Fedorovka aýylynyń kásipkeri Naýryzbek Birmaǵambetov jeńiske laiyq dep tanyldy. Onyń esebinde qorshaǵan ortany qorǵaý boiynsha kóptegen jobalar men is-sharalar bar.
Al «Jyldyń áleýmettik jobasy» nominatsiiasy boiynsha jeńisti Petropavl qalasynan kelgen stýdent, «Barshaǵa arnalǵan ǵylym» jobasynyń jetekshisi Valeriia Astapova jáne «Tahtay Team» jekpe-jek klýbynyń negizin qalaýshy, MMA kásibi sportshysy, Astanadan kelgen Vasilii Tahtai bólisti.
Astana qalasynan kelgen stýdent Dias Túgelbaev pen Taraz qalasynan kelgen Aiaýlym Rasylhan «Rýhty belsendi» jyl belsendisi nominatsiiasy boiynsha jyldyń úzdik belsendileri atandy.
«Pandemiianyń asa aýyr kezeńinde kún saiyn 300-den astam otbasyǵa ystyq tamaq jetkizip júrdik. Kópbalaly jáne az qamtylǵan otbasylarǵa, zeinetkerlerge jáne erekshe qajettilikteri bar adamdarǵa 120 myńnan astam meditsinalyq maska tarattyq. Al úiden shyǵa almaǵandarǵa azyq-túlik pen dári-dármek jetkizdik. Meniń oiymsha, árbir qazaqstandyq azamat belsendi bolyp, ainalasyndaǵy jaǵdaiǵa bei-jai qarai almaýy kerek. «AMANAT» partiiasynda eńbegimdi elenip jatqanyna qýanyshtymyn», – dedi Aiaýlym Rasylhan.
«Rýhtastar» syilyǵy aiasynda «Jyly júrek» nominatsiiasy boiynsha Oral qalasynyń turǵyny Talǵat Shýdaba jáne Qaraǵandydan kelgen stýdent Aqsanat Tólesova úzdik volonterler atandy. Belgili belsendi azamat, «Belgisiz Qazaqstan» blogynyń avtory, astanalyq Dias Kameridanov «Media salasynyń úzdigi» nominatsiiasy boiynsha jeńimpaz dep tanyldy.
«Qaiyrymdylyq jáne volonterlik isimen 7 jyldan beri ainalysyp kelemin. Biz muqtaj adamdardy azyq-túlikpen qamtyp, kómek kórsetemiz. Sondai-aq, shalǵai aýyldarda qudyq qazamyz. Budan ózge de áleýmettik jobalardy qolǵa alyp júrmiz. Men úshin volonterlik qyzmet – júrek qalaýy», – dedi Talǵat Shýdaba.
Sonymen qatar, M. Áýezov atyndaǵy Ońtústik Qazaqstan ýniversitetiniń bólimshesi jáne Almaty qalasy Áýezov aýdandyq bólimshesi «Jastar Rýhy» jastar qanatynyń úzdik bólimshesi bolyp tanyldy.
«Rýhtastar» syilyǵy – bul jai ǵana jaqsy dostarmen júzdesý jáne belsendilerdiń eńbegin qurmetteý emes. Bul – shalqar shabyt, áleýmettik jumyspen ainalysýǵa, muqtaj jandarǵa kómektesýge, úirenýge, igi jumys isteýge jáne armandaýǵa yntalandyrý. Osy shabyt uzaq ýaqyt qanattandyrady dep senemin motivatsiia maǵan uzaq ýaqyt jetedi», – dedi Ońtústik Qazaqstan ýniversiteti janyndaǵy «Jastar Rýhy» bóliminiń basshysy Gúlrýh Kýdratýllaeva.
«Jastar Rýhy» jastar qanatynyń Pavlodar jáne Aqmola oblystaryndaǵy filialdary «Úzdik filial» nominatsiiasy boiynsha jeńimpaz atandy.
