«Amanat» saqtandyrý kompaniiasy «Bek Eir» áýe kompaniiasy ushaǵynyń apatqa ushyraýy saldarynan qaza tapqandar men zardap shekkenderge ótemaqy tóleidi, dep habarlaidy "Ult aqparat".
«Amanat» kompaniiasy 2019 jyldyń 27 jeltoqsanynda Almaty oblysynda apatqa ushyraǵan «Bek Eir» áýe kopaniiasynyń bort nómiri UP-F1007 Fokker 100 ushaǵy jolaýshylarynyń áýe tasymaldaýshysynyń jaýapkershiligin saqtandyrýshysy ekendigin málimdegim keledi. Osy kólik quraly iesi jolaýshylar aldyndaǵy tasymaldaýshynyń azamattyq-quqyqtyq jaýapkershiligin mindetti saqtandyrý kelisimsharty boiynsha Amanat-ta saqtandyrǵan», - dep jazdy atalǵan saqtandyrý kompaniiasynyń basqarma tóraǵasy Erǵali Begimbetov Facebook-tegi paraqshasynda.
Onyń atap ótýinshe, Qazaqstan Respýblikasynyń «Jolaýshylar aldyndaǵy tasymaldaýshynyń azamattyq-quqyqtyq jaýapkershiligin mindetti saqtandyrý týraly» Zańyna sáikes, saqtandyrý ótemaqysyn densaýlyǵyna ziian kelgen jolaýshylar, sonymen qatar qaza bolǵan jolaýshylardyń asyraýynda bolǵan zardap shekken tulǵalar alady.
Atap aitqanda, jarymjan bolǵan, jaraqat alǵan nemese densaýlyǵyna basqa da ziian kelgen jolaýshylar emdeýge ketken naqty shyǵyndar mólsherinde 200 AEK-ke deiin (505 myń teńge) ótemaqy alady. Ushaq apaty saldarynan múgedektigi anyqtalǵan jolaýshylarǵa múgedektik tobyna bailanysty kompaniia 2 500-den 5 000 AEK-ke deiin (6 312 000-12 625 000 teńge) ótemaqy beredi. Qaza tapqan jolaýshy úshin 5 000 AEK (12 625 000) ótemaqy tóleý qarastyrylǵan.
Munan bólek, jerleý rásimderin júrgizgen tulǵa 100 AEK mólsherinde jer qoinyna tapsyrý shyǵyndaryn ótep alady. Árbir zardap shegýshiniń zaqymdanǵan múlkine 250 AEK-ke deiin ótemaqy tóleý qarastyrylǵan.
«Zańǵa sáikes, saqtandyrý ótemaqysy «Bek Eir» AQ pen zardap shegýshiden zań talap etetin qujattar saqtandyrý kompaniiasyna túsken kúnnen bastap 7 jumys kúniniń ishinde ótelýi tiis. Biz birden bolmasa da, ony barynsha jyldam júzege asyramyz. Qaza tapqandardyń týystary men jaqyndaryna kóńil aitamyz. Amanat óziniń barlyq mindettemelerin oryndap, ótemaqyny rásimdeý barynsha jedel jáne aýyrtpalyqsyz júrgizilýi úshin barlyq kúsh-jigerin jumsaidy. Eger júgingenderdiń birinde problema týyndap jatsa, onda maǵan jeke uialy telefonyma habarlasýyn ótinemin: +77772120074», - dedi Erǵali Begimbetov.
