.jpeg)
«AMANAT» partiiasynyń qoldaýymen «Uly dala joryǵy» atty tuńǵysh respýblikalyq marafon-báige bastaldy. 100-den astam shabandoz Qazaqstannyń kieli jerlerin aralap, elordadan Túrkistanǵa deiingi 1200 shaqyrym qashyqtyqty basyp ótedi.
Búgin «AMANAT» partiiasynyń Tóraǵasy Erlan Qoshanov «Uly dala joryǵy» respýblikalyq at marafonynyń bastalýyna arnalǵan saltanatty rásimge qatysty.
Is-sharany ashqan Erlan Qoshanov el Prezidenti Qasym-Jomart Toqaevtyń quttyqtaý sózin oqyp berdi.
«Bizdiń babalarymyz Uly dala shejiresin tulpardyń tuiaǵymen jazǵan. Búgingi urpaq – sol kóshpendiler mádenietiniń zańdy murageri. Shyn máninde, qazaq pen jylqy egiz uǵym. Arǵymaq atty halqymyzdyń simvoly deýge bolady. Biz qazirgi zamannyń jaqsy qasietterin boiǵa sińire otyryp, ulttyq bolmysymyzdy jańǵyrtýǵa tiispiz. Búgingi báigeniń basty maqsaty osy. Ár óńirden kelgen shabandozdar keń baitaq Qazaq dalasyn kóktei ótip, qasietti Túrkistan qalasyna at basyn tireidi. Bul – naǵyz azamattar men qazanattar synalatyn doda. Sondai-aq elimizge rýhani serpilis ákelip, jastardy otanshyldyqqa baýlityn biregei joba», – delingen Memleket basshysynyń quttyqtaýynda.
Marafonǵa qatysýshylarǵa arnaǵan sózinde partiia Tóraǵasy «AMANAT» aldaǵy ýaqytta da at sporty túrleri men basqa da ulttyq sport baǵyttaryn nasihattaýǵa jáne damytýǵa atsalysatynyn atap ótti.
«Prezidentimizdiń bastamasymen qazir elimizde aýqymdy ózgerister bolyp jatyr. Biz Ádiletti Qazaqstanǵa bastaityn joldyń bastaýynda turmyz. Búgingi joryqtyń osyndai tarihi kezeńmen tuspa-tus kelýiniń úlken simvoldyq máni zor. Bizdiń ulan-ǵaiyr jerimiz bar. Sol keń baitaq jerdi kesip ótý – ol jigittiń jigitiniń ǵana qolynan keletin jáne attyń aty ǵana shydaityn uzaq jol. Sondyqtan jorytqanda joldaryńyz bolsyn», – dedi Erlan Qoshanov.
Ashylý saltanatyna Mádeniet jáne sport ministri Dáýren Abaev, qala ákimi Altai Kólginov, Parlament depýtattary men qoǵam qairatkerleri qatysty.
Uiymdastyrýshylardyń aitýynsha, álemdik tájiribede teńdesi joq bul marafon shabandoz mádenietin Qazaqstan brendi retinde qalyptastyrýǵa negiz bolady.
18-29 qyrkúiek aralyǵynda marafonshylar elordadan Túrkistan qalasyna deiin 1200 shaqyrymnan asa qashyqtyqty basyp ótedi. Marafon 100 shaqyrymdyq 12 satyǵa bólingen. Elimizdiń árbir óńirinen marafonǵa 1 komandadan qatysady. Marafonǵa qatysýshylarǵa Uly Dala rýhyn sezinýge jáne túrkilerdiń kieli jerleri – Joshy han, Alasha han keseneleri, sondai-aq Qazaq handyǵynyń alǵashqy astanasy Sozaq qalasy pen túrki rýhaniiatynyń besigi Túrkistan qalasy siiaqty tarihi oryndarǵa ziiarat jasaýǵa múmkindik týady.
Sońǵy meje – Túrkistan qalasyna deiin eń qysqa ýaqyt ishinde jetken komanda músheleri bas júlde – «Uly dala sarbazy» ataǵy men 30 000 000 teńge kólemindegi júldemen marapattalady. 2-shi jáne 3-shi oryn iegerleri sáikesinshe 20 000 000 teńge jáne 15 000 000 teńge júldeni qanjyǵaǵa bailaidy.
Jarys barysynda barlyq qatysýshylar demalys oryny, azyq-túlikpen jáne qajetti meditsinalyq kómekpen qamtamasyz etiledi.
Marafon-báigeni «AMANAT» partiiasy, «The Great Steppe Tour» qoǵamdyq qory men Ulttyq sport túrleri qaýymdastyǵy, QR Mádeniet jáne sport ministrligi uiymdastyrdy.
