«AMANAT»-tyń Atqarýshy hatshysy Ashat Oralov beinekonferentsiia bailanysy arqyly partiianyń óńirlik filialdarymen azyq-túlik pen halyq tutynatyn taýarlar baǵasynyń qymbattaý máselesine qatysty keńes ótkizdi, dep habarlaidy "Ult aqparat".
Osy aptadan bastap elimizdiń barlyq oblys jáne aýdandarynda 216 partiialyq monitoring jáne qadaǵalaý toby jumysqa kiristi. Olar saýda nysandaryn tekseredi jáne áleýmettik mańyzy bar ónimderdiń baǵasyna monitoring júrgizedi. Bul týraly «AMANAT» partiiasynyń Atqarýshy hatshysy Ashat Oralov málimdedi.
Atap aitqanda, ol eldegi infliatsiianyń jedel ósýine syrtqy faktorlardan basqa, saýda júiesindegi deldaldar men alypsatarlardyń aitarlyqtai kóbeiýi yqpal etkenine nazar aýdardy.
«14 shildede Memleket basshysy Qasym-Jomart Toqaev Úkimettiń keńeitilgen otyrysynda taýarlar baǵasyn turaqtandyrý jáne azamattardyń tabysyn arttyrý boiynsha naqty mindetterdi belgiledi. Degenmen, memlekettik organdar qabyldaǵan is-sharalar baǵanyń ósýin tejeýge tolyq kólemde yqpal etpeidi. Baǵany jón-josyqsyz kóteretin satýshylar tekserý ýaqytyn aldyn ala bilip otyrady jáne olar memlekettik organdar tekserýshileriniń túrin tanidy», - dedi Atqarýshy hatshy.
Ulttyq statistika biýrosynyń derekterine súiensek, maýsym aiynda jyldyq infliatsiia 14,5%-dy qurady. Bir jyl ishinde eń kóp qymbattaǵan – azyq-túlik taýarlary (17,9%). Azyq-túlik emes taýarlardyń baǵasy 11,1%-ǵa, aqyly qyzmetterdiń baǵasy 8,9%-ǵa ósti.
«Qoǵamdyq saiasat institýtynyń áleýmettik zertteýine sáikes, qazaqstandyqtardyń 80%-dan astamy baǵanyń ósýine alańdaidy. Bul másele ásirese, áleýmettik osal toptar úshin óte ózekti. Biz osy jaǵdaidy partiianyń barlyq óńirdegi qoǵamdyq qabyldaý bólmelerine kelip túsken ótinishterdiń artýynan baiqap otyrmyz. Máselen, jyl basynan beri áleýmettik qamsyzdandyrý máselelerimen júgingenderdiń úlesi 30%-ǵa ósti. Osyǵan bailanysty biz jergilikti jerdegi naqty jaǵdaidy anyqtaý úshin azyq-túlik pen taýarlar baǵasyna monitoring júrgizetin 216 arnaiy top qurdyq. Qazirdiń ózinde dúken sórelerindegi baǵalar men memlekettik organdardyń esepteri bir-birine sáikes kelmeidi deýge bolady», dep atap ótti Ashat Oralov.
Atqarýshy hatshy monitoring tobyna tek partiialyqtar ǵana emes, sondai-aq qoǵam belsendileri, úkimettik emes uiymdardyń ókilderi, biznesmender, jýrnalister men táýelsiz sarapshylar da kiretinin aitty. Jumys nátijeleri Parlament Májilisinde jáne Úkimette qaralady.
Aimaqtardaǵy qazirgi jaǵdai týraly Májilis depýtaty, partiia janyndaǵy Agroónerkásiptik komitet tóraǵasy Qainar Abasov jáne Májilis depýtaty, partiia janyndaǵy Ekonomika, kásipkerlik jáne agrarlyq sektor máseleleri jónindegi respýblikalyq keńestiń múshesi Ǵalym Ámireev.
Shyǵys Qazaqstan oblysyndaǵy jaǵdai týraly monitoring tobynyń múshesi, Óskemen qalalyq máslihatynyń depýtaty Zoia Novolodskaia aityp berdi.
«Kesheden beri óńirde 84 saýda nysanyna monitoring júrgizildi. Júrgizilgen taldaý nátijesinde ákelinetin kókónisterdiń (kartop, sábiz, piiaz, qyryqqabat) baǵasyn 19%-ǵa kóterý faktisi anyqtaldy. Monitoring kezinde kásipkerler satyp alý baǵasyn kórsetetin qujattaryn usyna almady. Túsindirý jumystary júrgizilip, atalǵan nysandar partiialyq baqylaýǵa alyndy», - dedi ol.
Sondai-aq, jiyn barysynda Nur-Sultan qalasy boiynsha ekonomika jáne kásipkerlik máseleleri jónindegi Qoǵamdyq keńestiń tóraǵasy Bolat Omarov sóz aldy.
«Elordada kartop – 10872 tonna (65%), sábiz – 2938 tonna (76%), qyryqqabat – 1900 tonna (49%), piiaz – 2695 tonna (107%) siiaqty áleýmettik mańyzy bar azyq-túlik taýarlarynyń bes ai tutynýǵa bolatyn 30% qory jasaldy. Birinshi surypty unnan jasalǵan nan baǵasyn turaqtandyrý úshin memorandým aiasynda elordanyń óńdeý kásiporyndaryna astyq jiberilýde», – dedi ol.
«AMANAT»-tyń Túrkistan oblystyq filialynyń atqarýshy hatshysy Beisenbai Tájibaevtyń aitýynsha, óńirde 18 partiialyq monitoring toby qurylǵan.
«28 shildede atalǵan toptar oblystyń 88 bazary men iri saýda nysandaryn aralady. Baǵanyń ósýin tejeý úshin oblysta turaqty túrde aýyl sharýashylyǵy jármeńkeleri uiymdastyrylady, baǵanyń negizsiz ósýine jol bermeý boiynsha iri saýda uiymdarymen memorandýmdar jasalady. Biz qazirdiń ózinde 1467 úi mańyndaǵy dúkenderdiń 1463-in (99,7%) tekserdik, baǵany negizsiz kóterýdiń 38 faktisi anyqtaldy. Tiisti sharalar qabyldaý arqyly baǵalar 10-15%-ǵa tómendedi», - dep atap ótti ol.
«AMANAT» partiiasynda monitoring júrgizetin toptar kún saiyn jumys isteitini aityldy. Aimaqtardaǵy áleýmettik mańyzy bar azyq-túlik baǵasynyń ózgergenine qatysty málimettiń mán-jaiy Partiialyq baqylaý komissiiasynyń otyrysynda qaralady. Ózgeris anyqtalǵan jaǵdaida máseleni sheshý úshin usynymdar ázirlenip, naqty merzimi men jaýapty tulǵalar belgilenedi.
Foto - Áli Ǵalym
