Foto: «AMANAT» partiiasynyń baspasóz qyzmeti
«AMANAT» partiiasynyń músheleri latifýndisterden jerdi tárkileý protsesin baqylaýda ustaidy. Bul týraly «AMANAT» partiiasy janyndaǵy Memlekettik basqarýdy damytý jáne sybailas jemqorlyqqa qarsy is-qimyl jónindegi respýblikalyq qoǵamdyq keńestiń tóraǵasy Erlan Sairov málimdedi.
Ol qazirgi ýaqytta memleketke Bolat Nazarbaevtyń enshiles kompaniialaryna tiesili Mańǵystaý oblysynda 239 myń gektar, Jambyl oblysynda 60 myń gektar jer memleketke qaitarylǵanyn atap ótti. Buǵan deiin Bas prokýratýramen birlesip júrgizilgen jumys barysynda Bolat Nazarbaevqa tiesili jalpy aýmaǵy 244 gektar bolatyn 59 jer telimi anyqtalǵan edi.
«AMANAT» partiiasynyń Qoǵamdyq alań retinde árbir azamattyń enshisi bolyp tabylatyn ulttyq bailyqty memleketke qaitarý basty missiiasy dep bilemiz! «Barmaq basty, kóz qystymen» jymqyrylǵan halyq yryzdyǵyn qaitarý jumysyn júieli júrgizemiz. Mártebeli familiiaǵa, «burynǵy eńbegińizge», qaltańyzdyń qalyńdyǵyna qaramaimyz. Halyqtyń menshigine qol saldyńyz ba? Qaitarasyz. Almaqtyń da salmaǵy bar jáne ol aýyr», - dedi Erlan Sairov.
Sondai-aq, jiyn barysynda partiialyqtar Astana qalasy boiynsha sybailas jemqorlyqqa qarsy is-qimyl jónindegi jumystyń jai-kúiin jáne partiianyń sailaýaldy ýádelerin júzege asyrý jumysyn qarady.
Keńes músheleri sońǵy úsh jylda Astana qalasyndaǵy jergilikti atqarýshy organdardaǵy sybailas jemqorlyqqa qarsy is-qimyl jónindegi jumysty taldady. Kórsetilgen kezeńde Sybailas jemqorlyqqa qarsy qyzmet 203 sybailas jemqorlyq qylmysty tirkedi. Olardyń negizgi bóligi paraqorlyq – 147, urlyq – 47 jáne laýazymdyq ókilettikterin asyra paidalanýdyń 9 faktisi tirkeldi.
Keńes tóraǵasynyń orynbasary Ǵalym Baitoq atap ótkendei, jergilikti atqarýshy organdardyń sybailas jemqorlyqqa qarsy is-qimyl jumysynda formalizm oryn alýda. Atap aitqanda, elorda ákimdigi janyndaǵy sybailas jemqorlyqqa qarsy is-qimyl jónindegi komissiia 2021 jyly 1 otyrys qana ótkizse, al 2020 jyly birde-bir jiyn bolmaǵan.
«Elordadaǵy jergilikti atqarýshy organdardyń júktelgen mindetti oryndaý kezindegi jaýapkershiligi tómen ekenin atap ótý qajet. Astana qalasy boiynsha sybailas jemqorlyqqa qarsy is-qimyl jáne memlekettik basqarýdy damytý jónindegi isterdiń jai-kúiin zerdeleý barysynda Keńestiń jumys toby suratqan aqparatty Almaty aýdanynyń ákimdigi jáne qurylys basqarmasy múldem bermegen. Sondai-aq, elordanyń aýdandyq ákimdikteriniń resmi saityn zerdeleý kezinde olardyń qajetti aqparatqa qol jetkizýdi qamtamasyz etpegeni anyqtaldy», - dedi Ǵalym Baitoq.
Keńes tóraǵasynyń orynbasary jurtshylyqtyń shaǵymyn týdyryp otyrǵan elordadaǵy qurylys máselelerine jeke toqtaldy.
«Elordada bei-bereket qurylys jalǵasýda. Mysaly, Astana Mall SOO mańyna 15-ten astam turǵyn úi kesheni salyndy jáne birde-bir mektep joq. Bul ákimdiktiń áleýmettik nysandardy: balabaqshalardy, mektepterdi, emhanalardy salý protsesin múldem qadaǵalamai, úiler salýǵa ruqsat beretindigin aiǵaqtaidy. Bul protsess múldem rettelmegen, qajet jerge mektep salynbaǵan», - dep atap ótti ol.
Aita ketý kerek, partiianyń «Ózgerister joly: Ár azamatqa laiyqty ómir!» sailaýaldy baǵdarlamasyn júzege asyrý aiasynda eki jyl ishinde Astanada 19 mektep, 2 dene shynyqtyrý-saýyqtyrý kesheni, 21 meditsina nysany, 400 myń sharshy metrden astam kommertsiialyq úi-jai salyndy. Tek 2022 jyly 30 myńnan astam jumys orny ashyldy.
