Parlamenttiń zań shyǵarý qyzmetin túsindirý boiynsha óńirlerdegi kóshpeli jumys aiasynda depýtattar – «AMANAT» partiiasy Fraktsiiasynyń músheleri 766 eldi mekende bolyp, 1 200-den astam kezdesý ótkizdi.
Bul týraly «AMANAT» partiiasynyń jańa baspasóz ortalyǵynda ótken baspasóz maslihatynda halyq qalaýlylary Albert Raý, Juldyz Súleimenova, Ekaterina Smyshliaeva jáne Berik Ospanov aitty, dep habarlaidy "Ult aqparat".
Memleket basshysy, Partiia Tóraǵasy Q.Q.Toqaev partiianyń kezekten tys HHI Sezinde depýtattardyń azamattarmen tikelei kezdesýiniń mańyzdylyǵyn erekshe atap ótti. «Sailaýshylarmen tikelei dialog qurý, turaqty túrde azamattarmen kezdesý asa mańyzdy, osy oraida shalǵaidaǵy aýyldarǵa barý kerek. Depýtattyq saýaldar formalizmnen aýlaq bolyp, olardyń mazmuny naqty máseleni qamtyp, turǵyndar problemasyn kórsetýi kerek», dep atap ótti Memleket basshysy.
Túsindirý jumystarynan basqa, depýtattar jergilikti atqarýshy organdardyń ókilderimen birlesip azamattardy jeke qabyldady. Barlyǵy 2,5 myńnan astam ótinish qaralyp, olardyń 321-i birden oń sheshimin tapty.
Jalpy, kezdesý qorytyndysy boiynsha 1209 túiindi másele anyqtaldy. Azamattardyń shaǵymdary men ótinishteriniń kópshiligi áleýmettik salaǵa, atap aitqanda densaýlyq saqtaý, bilim berý, áleýmettik qorǵaý jáne eńbekti qorǵaý máselelerine qatysty boldy.
Sondai-aq, azamattar aýyl sharýashylyǵyn, shaǵyn jáne orta biznesti qoldaý, injenerlik infraqurylymdy damytý jáne t.b. máselelerdi kóterdi.
«Mysaly, shalǵai aýyldardyń turǵyndary «Meditsinalyq poiyz» jobasyn qaitarý týraly ótinishterin bildirdi. Aldyn-ala nemese kúrdeli tekserýden ótý úshin aýyl turǵyndary aýdan ortalyǵyna barýy qajet. Alys qashyqtyqqa, joldardyń sapasy men azamattardyń múmkindikterine bailanysty árkim aýdan ortalyǵyna bara almaidy. Depýtattar bul baǵytta úkimetpen birlesip jumys atqardy. Endi 2022 jyldyń mamyr aiynda meditsinalyq poiyz iske qosylady», - dedi Ekaterina Smyshliaeva.
«Bizge oqýlyqtardyń avtorlary, mektep ujymdary men ata-analar mektepterdegi oqý ádebietiniń sapasyna qatysty ótinish jasady. Tańdaý múmkindigi týraly aitylǵanymen, biraq zańnamalyq tetik bolmady. Depýtattar tiisti zańǵa túzetýler engizdi, ol qazir Senattyń qaraýynda», - dep atap ótti Juldyz Súleimenova.
Sondai-aq aýyl turǵyndary depýtattarǵa aýyz sý máselesine qatysty da suraqtar qoidy.
«Árbir aýylǵa baryp, taldaý júrgizdik. Fraktsiia depýtattarynyń usynystaryna sáikes, sýmen jabdyqtaý nysandarynyń tizbesine Ministrlik 82 jańa jobany qosty», - dedi Albert Raý.
Barlyq suraqtar arnaiy taldaý hatqa jinaqtalyp, Úkimetke jiberildi. 6 sáýirdegi jalpy otyrys barysynda vitse-premer Eraly Toǵjanov problemalardyń bir bóligin qaraý qorytyndylary boiynsha esep berdi. Jalpy otyrys barysynda qaralmaǵan barlyq máseleler boiynsha Úkimetpen jumys jalǵasýda.
