Kemerovo oblysynyń burynǵy gýbernatory Aman Tóleev Kemerovo oblysy halyq depýtattary keńesiniń tóraǵasy bolyp sailandy. Mundai sheshim aimaq parlamentiniń kezekten tys sessiiasynda qabyldandy, - dep habarlaidy RIA "Novosti". Qupiia daýys berýde jalǵyz kandidat - Tóleevti 39 depýtattyń 38-i qoldaǵan.
3 sáýirde Tóleev depýtattyq mandat ielengen. 9 sáýirde oblys parlamentiniń basshysy Aleksei Sinitsyn ókilettiginen merziminen buryn bas tartqan. Onyń ornyna Tóleevti "Edinaia Rossiia" partiiasy usyndy. Al "Edinaia Rossiianyń" Memlekettik dýmadaǵy fraktsiiasynyń basshysy Sergei Neverov buǵan qarsylyq tanytqan. "Halyq mundai sheshimdi túsinbeidi" degen Neverov. Kreml bul jaǵdaiǵa aralasqan joq.
1 sáýirde Kemerovo oblysynyń basshysy Aman Tóleev "Zimniaia vishnia" saýda jáne oiyn-saýyq ortalyǵynda 64 adam qaza tapqan órtten soń otstavkaǵa ketkeni belgili bolǵan. Munyń aldynda Kemerovo turǵyndary stihiialy túrde ótkizgen mitingide Tóllevtiń otstavkaǵa ketýin talap etken. Sol kezde Semerovoǵa barǵan Resei prezidenti Vladimir Pýtin mundai máseleler "kamera astynda" sheshilmeitinin málimdegen.
Tóleevtiń ózi qaiǵyly oqiǵaǵa Pýtinniń aldynda keshirim suraǵan. Ol alańǵa shyqqan qala turǵyndaryn "shataq izdeýshiler" dep ataǵan.
Resei Tótenshe jaǵdailar ministrliginiń málimetinshe, saýda ortalyǵyndaǵy órtten 64 adam qaza taýyp, 40-tan astam adam jaralanǵan. Qurbandardyń kópshiligi - balalar.
