Kemerovo oblysynyń gýbernatory Aman Tóleevtiń otstavkaǵa ketý týraly sheshim qabyldaǵanyn jazǵan bolatynbyz. Búgin óńir basshysy saýda ortalyǵynda bolǵan órtten qaza tapqandardyń týǵan-týystaryna kóńil aityp, keshirim surady jáne oblys turǵyndarymen qoshtasty, dep jazady sn.kz.
Gýbernatordyń aitýynsha, Kemerovo oblysymen birge qaiǵyly jaitqa búkil álem aza tutyp jatyr. Oqiǵany estigen árbir adam ony júregimen qabyldaǵan.
«Qurmetti kýzbasstyqtar, men qolymnan kelgenniń bárin jasadym. Qaraly otbasylarmen kezdesip, kómek kórsetý máselesin túgeldei sheship berýge tyrystym. Taǵy da barshańyzǵa qaiǵyra kóńil aitamyn. Tiri adam tirshiligin jasaidy, ómir munymen toqtap qalǵan joq. Marqum bolǵan týystarymyzdy eske alý úshin de ómir súrýimiz qajet», — dedi Aman Tóleev óz sózinde.
Ol sondai-aq, videoúndeý barysynda otstavkaǵa ketý týraly ótinishin óz erkimen, eshkimniń yqpalynsyz jazǵanyn aityp, halqymen qoshtasty.
