«Abai» shahtasynda oryn alǵan metannyń kenetten taralýy kezinde aman qalǵan eki kenshi sol kúngi apat týraly aityp berdi. Olar 6 áriptesiniń ólimine qatysty kóńil aityp, dárigerler men qutqarýshylarǵa alǵys bildirdi, dep habarlaidy QazAqparat tilshisi.
Elaidyn Zeinalov pen Jeńis Maralbaev 7 qarashada aýrýhanaǵa jetkizildi. Eki naýqas ta shahtalyq gazdan, onyń ishinde metan jáne ýly gazdan jiti ýlanǵan.
Ári qarai kómek kórsetý úshin jansaqtaý bólimine jatqyzyldy.
8 qarashada reanimatsiiadan shyqqan naýqastar odan ári emdeý úshin palataǵa, toksikologiia bólimine aýystyryldy.
Qaraǵandy oblysy densaýlyq saqtaý basqarmasynyń málimetinshe, olardyń jaǵdaiy turaqty.
Kórsetkish nátijesine qarai otyryp, olardy kelesi aptada úige shyǵarýy múmkin. Kenshiler qaiǵyly kúndi túrshige eske alady.
«Biz jumysqa keldik. Bári jaqsy boldy. Jumysqa daiyndala bastadyq. Apat nelikten bolǵanyn eshkim bilmeidi. Bir mezgilde daiyndyqpen ainalysatyn jigitter: «Gaz. Shyǵyńdar» dep aiqai saldy. Biz qaita burylyp, shyǵa bastadyq. Ári qarai ne bolǵanyn túsinbei qaldym. Basqa eshteńe esimde joq. Shań kóterildi. Jel turdy. Qubyrdan soryp shyǵaryp jatqandai sezindim ózimdi. Meni alyp shyqqany esimde. Apat orynda bir saǵatqa jýyq jattym. Qudaiǵa shúkir, tiri qaldym. Qaza bolǵandar máńgi esimizde qalady. Olardy esime alǵan saiyn júregim syzdaidy. Bárimiz birge iyq tirese jumys istedik. Eń az bilemin degen jigittermen bes-alty jyl birge jumys istedik. Al kóbisimen 15-20 jyl qyzmettes boldyq. Barlyǵy da jaqsy jigitter edi. Eshqashan umytpaimyn. Biz qalai kómekteser edik? Qolymyzdan eshteńe kelmedi. Al olardyń ata-analaryna sabyr tileimin, osy qaiǵyǵa tótep berer jiger tileimin. Biz shamamyz kelgenshe qoldaý kórsetemiz», - deidi Elaidyn Zeinalov.
Ol sondai-aq dárigerlerge jáne barlyq meditsinalyq qyzmetkerlerge kórsetken kómekteri úshin alǵysyn bildirdi.
Jeńis Maralbaev ta dárigerler men qutqarýshylarǵa alǵysyn bildirdi.
«Barlyq sátter esimde joq. Jarq etti. Kenetten jarylys sezindim. Sodan keiin tútin shyqty. Shamdar shiqyldai bastady. Esimnen tanyp qaldym. Shahtinsk bólimshesinen kelgen jigitterge rahmet. Jedel shyǵaryp aldy. Meni birinshi shyǵardy. Gazdyń iisi de, dámi de joq. Birneshe ret dem alasyń, esińnen tanyp qalýǵa sol da jetkilikti. Dárigerlerge rahmet. Barlyq em-sharalaryn jasady. Kútim de jaqsy boldy. Shahtinsk bólimshesinen kelgen jigitterge jeke alǵysymdy aitamyn. Óte jyldam jumys istedi. Qutqaryp aldy», - deidi aman qalǵan ekinshi shahter Jeńis Maralbaev.
Eske sala keteiik,7 qarashada «Abai» shahtasynda jeldetkish shtrek kenjarynda metan taraldy. Apat saldarynan alty shahter qaza tapty, taǵy ekeýi aýrýhanaǵa tústi.
Eske salaiyq, 7 qarashada «ArselorMittal Temirtaý» AQ kómir departamentiniń «Abai» shahtasynda metan gazy tarai bastaǵan.
Bul ýaqytta shahtada 64 adam jumys istep jatqan, 54-i evakýatsiialandy.
Apat saldarynan eki adam zardap shegip, alty kenshi qaza tapty. Zardap shekkender aýyr halde jansaqtaý bóliminde jatyr.
Prezident Qasym-Jomart Toqaev qaza tapqan shahterlerdiń jaqyndary men týystaryna kóńil aitty. Sondai-aq zardap shekken azamattardyń tezirek saýyǵyp ketýine tilektestik bildirdi.
