Aljirde sársenbi kúni aýrýhananyń jańa týǵan sábilerge arnalǵan palatasy órtke oranyp, 8 sábi kóz jumdy, dep habarlaidy CNN.
Ennahar jeke televiziia arnasynyń málimetinshe, órt shyǵystaǵy El-Ýed (El-Oued) provintsiiasynyń Al-Um Bashir bin Nasser Hospital aýrýhanasynan shyqqan. Sábilerdiń máiiti túgeldei órtenip ketti. Bul olardy tanýda qiyndyq týdyryp otyr.
Halyqty qorǵaý máselesi jónindegi direktorattyń málimetinshe, jańa týǵan sábiler kúiik shalyp, tútinge ýlanǵannan kóz jumǵan.
11 sábi, 37 áiel men 28 qyzmetker qutqaryldy. Órt jergilikti ýaqyt boiynsha 3:52-de shyqqan. Oqiǵa ornyna ondaǵan órt sóndirýshi keldi.
Aljirdiń densaýlyq saqtaý ministri órttiń sebepterin shuǵyl túrde tergeýdi talap etip otyr. Aldyn ala málimetterge sáikes, órtke elektr symdarynyń qysqa tuiyqtalýy sebep bolǵan.
Kóz jumǵan balalardyń otbasylary aýrýhana ǵimaratynyń aldyna jinalyp, oqiǵany tergeýdi talap etýde.
