Saiasattanýshy Alýa Joldybalina Ulttyq qoǵamdyq senim keńesiniń ózine eldiń senimi qalyptasyp bolmaǵanyn aitty, dep habarlaidy QazAqparat tilshisi.
Ulttyq qoǵamdyq senim keńesi týraly el arasynda tolyq túsinik qalyptasyp úlgergen joq. Saiasattanýshy Alýa Joldybaeva keńes qyzmetine arnalǵan dóńgelek ústelde osyndai pikir aitty.
«Jalpy BAQ pen áleýmettik jelidegi pikirlerge zer salsaq, el arasynda Ulttyq keńes týraly naqty tolyq túsinik joq. Ulttyq keńesti ákimdikter men memlekettik organdar janyndaǵy qoǵamdyq keńestermen shatastyryp jatqandar kóp. Bul keńestiń respýblikalyq deńgeide jumys isteitinin, onyń Ulttyq statýsy bar ekenin el uqpai jatqan siiaqty. Ásirese, aimaqtarda osyny elge túsindirý qajet», - deidi sarapshy.
Onyń oiynsha, Ulttyq keńestiń maqsaty men mindeti elge aiqyn emes. Alýa Joldybalina keńestiń jumys formatynda qatysty da óz oiyn bildirdi.
«Bir sózben aitqanda, Senim keńesiniń ózine senim qalyptastyrý qajet. Jarlyq boiynsha keńestiń jumys organy - Prezident Ákimshiliginiń bólimshesi. Biz Eýropadaǵy, Amerikadaǵy elderdiń, Aziiada Malaiziianyń tájiribelerine taldaý jasadyq. Biz mynadai úsh baǵytty usynar edik.
Birinshiden, azamattardyń aryzdarynyń, shaǵymdary men saýaldarynyń naqty júiesin jinaqtaý qajet. Kez kelgen memlekettik organdarǵa túsetin aryz-shaǵymdardy da osy topqa jinaqtaý kerek. Ekinshiden, ashyq jáne jabyq tyńdaýlar ótkizýdi usynamyz. Úshinshiden, jumys toptary men jumys organy «azamattyq jiýri» siiaqty jańa tehnologiialardy paidalanǵany abzal. Tórtinshi kezekte áleýmettik jeli arqyly dialog júrýi kerek. Osy tórt formatqa Prezident Ákimshiligi nazar aýdaryp, keńes músheleriniń jumysyn qamtamasyz etýi kerek. Keńestiń quramy óte oryndy iriktelgen. Tek endi sol quramnyń jumysyn qamtamasyz etý qajet», - dedi saiasattanýshy.
