Altyn Ordanyń 750 jyldyǵyn atap ótý aiasynda Pavlodar memlekettik pedagogikalyq institýyna qarasty tanymal arheolog Timýr Smaǵulov jetekshilik etetin Margulan Centre Áýliekól qalashyǵynda kesenelerdi qalypqa keltirý jumystaryn júrgizedi, dep habarlaidy pavlodarnews.kz.
Bul týraly óńirlik kommýnikatsiialar qyzmetinde ótken baspasóz máslihatynda oblystyq mádeniet, tilderdi damytý jáne arhiv isteri basqarmasynyń basshysy Ernur Dáýenov málim etti. - Joshy han tusynda Altyn Orda dáýiriniń negizgi ortalyǵynyń biri Ertis óńirinde boldy degen tujyrym bar, - deidi Ernur Dáýenov. - Ol Áýliekól jaǵasynda ornalasqan jáne sol jerde erekshe saqtalǵan qalanyń qaldyqtary bar. Osyǵan bailanysty mádeniet basqarmasymen 20 mln teńge qarajat bólinip otyr. Sol qalanyń negizgi beinesin qalpyna keltirýge tyrysamyz. Nátijesinde sol jerde áýlie Isabek Ishannyń kesenesimen birge týristik ortalyq, kieli oryn paida bolady degen oidamyz. Bul arheologiialyq qazba jumystar buryn da júrgizilgen, biraq biyl ǵylymi turǵydan júieli túrde qarajattyń bólinýimen uiymdastyrylady.
Vedomstvo basshysynyń aitýynsha, Áýliekól qalashyǵyn qalpyna keltirý boiynsha qazba jumystary maýsym aiynda bastalyp, tamyz aiynyń sońyna deiin júrgiziledi. Qyrkúiekte qorytyndysy shyǵarylyp, qarasha-qazan ailarynda halyqaralyq konferentsiia ótedi. Pavlodar memlekettik pedagogikalyq ýniversitetimen «Qazaqstan tarihyndaǵy «Ýlýg Ýlýs (Altyn Orda)» videodáris daiyndaý, sondai-aq «Uly dala murasy» jobasy aiasynda bilim mekemelerinde mýzeiler ashý josparlanyp otyr.
Altyn Ordanyń 750 jyldyǵyn atap ótýge arnalǵan oblystyq jospar boiynsha qalalar men aýdandarda barlyǵy 100-ge jýyq ártúrli is-shara ótedi. Onyń ishinde kórmeler men tanymdyq saǵattar, sýretter baiqaýy bar.
Aita keterligi, orta ǵasyrlyq Áýliekól qalashyǵy saiasi-mádeni jáne ákimshilik-ekonomikalyq ortalyq bolǵan. Halyq arasynda bul óńir Aqkól-Jaiylma degen atpen belgili.
